Urang Sunda Lébér Wawanén?

Bener cek Robby, urang Indonesia mah waranian. Tumpak motor bari ngangkut rongsokan mangkarung-karung ogé taya kasieun, geus puguhning ukur teu dihélem mah. | sundaonline.com

Urang Indonesia mah waranian. Kitu cék Robby, urang New Zealand, basa ulin jeung kuring ka toko alat-alat musik di Jalan Sunda Bandung, sawatara waktu ka tukang. Tapi ngomong kituna téh henteu bari ngacungkeun jempol, da puguh lain maksudna rek muji. Robby nyarita kitu téh bari gogodeg. Maksudna? Enya manéhna ngarasa hemeng ku tingkah urang Indonesia anu waranian ngarempak kana aturan. 

Tuh, Robby nunjuk ka jalan raya, aya nu tumpak motor teu dihélem. Aya barudak leutik maraké motor. Aya tukang ojég anu ngangkut barudak SD nepi ka opatan. Beu! Eta pamandangan sosial téh henteu bisa diangles, da enya ku panon kuring ogé katénjo.

Cikénéh kuring inget deui ka Robby. Lain ku hayang panggih jeung manéhna. Pangna inget ka éta bulé botak anu jangkung badag téh duméh dina sapoé éta kuring ngawénéhan sawatara urang Indonesia (Sunda) anu “waranian” téa. Lebah pudunan, di lelewek Kabupaten Bandung, kuring nempo lalaki déwasa keur ngangkut rongsokan kana motor. Mani asa paur waktu nempona téh, tapi jinisna mah kalah ka sura-seuri basa ngageuleuyeungkeun motorna téh. Kawasna geus biasa. Biasa ngangkut rongsokan mangkarung-karung kana motor. Biasa teu dihélem ari tumpak motor. Biasa ngarempak aturan téa. Héhé.... Bener cék Robby, waranian urang Indonesia mah. [] Endang GG