Beuki Loba Barudak Mumul kana Tatanen

Ayeuna mah hese manggihan budak anu cita-citana hayang jadi patani teh. Basa pareng kuring ngumpul jeung barudak SD – SMP anu keur les matematika di Rumah Bilangan, di Desa Nagrak Kacamatan Cangkuang Kabupaten Bandung, kuring nalek perkara cita-citana eta barudak. Walonna teh hayang jadi dokter, jadi perawat, jadi insinyur, jadi guru, jadi pulisi, jadi tentara, jadi desainer, jeung nu liana. Taya nu hayangeun jadi patani. Manggihan budak anu hayang jadi patani teh sarua hesena jeung manggihan budak anu hayang jadi presiden.

 

Lain hal anu aneh, da ti jaman kuring leutik oge sarua kitu, ari ngomongkeun perkara cita-cita teh kawas ilaharna barudak ayeuna: mumul jadi patani.  Ku sabab eta, ti beh ditu mula pamarentah geus nyieun rupa-rupa tarekah malar urusan tatanen pada mirosea. Malah di jaman orde baru katompernakeun, taun 1996, basa mieling Hari Pangan Sedunia, Presiden Soeharto cumeluk ka sakumna bangsa Indonesia sangkan ngagederkeun tradisionalisasi pangan, tur mikacinta produk sorangan. Ngan eta pamundut Presiden Soeharto kawasna ukur dianggap radio butut, da geuning sabada harita Pa Soeharto kalah ka pada ngeundeuk-ngeundeuk, tug ka ahirna Pa Soeharto lengser tina kalungguhanana. Cindekna mah, perkara tatanen di Indonesia tug ka wangkid ieu masih kritis. Hal ieu dibuktikeun ku beuki lobana barudak anu mumul jadi patani.

Geus puguhning di kota mah, dalah di pasisian oge barudak gideug basa dihiap jadi patani teh. “Aku mah mau jadi guru,” cek Nadine, budak Kelas dua SD Ciluncat I Kacamatan Cangkuang Kabupaten Bandung. “Aku mah pengen jadi dokter,” cek Aji, lanceukna Nadine anu kakara naek kelas dua SMP Negeri 1 Margahayu Kabupaten Bandung. Budak SMA/SMK oge sarua mumul jadi patani. “Akumah mau jadi desainer,” cek Raihan, siswa kelas tilu SMA Negeri 4 Bandung anu hayang nuluykeun sakolana ka jurusan seni rupa Institut Teknologi Bandung (ITB).

Fajar make baju kotak biru. (sundaonline/egg)

Lucuna, mahasiswa jurusan pertanian oge loba anu mumul jadi patani. Buktina? Cek Fajar Rizky Koespradana (23), mahasiswa tingkat ahir jurusan pertanian Universitas Padjadjaran (UNPAD), tina 140 mahasiswa saangkatanana, ngan 10 persen anu rek jadi patani mah. “Termasuk saya. Lamun tos lulus sayamah bade wirausaha kana agroindustri,” cek Fajar anu salila jadi mahasiswa nyambi jadi programer acara radio FM di Bandung.

Fajar netelakeun, 90 persen babaturan kuliahna harayang digawe di kantor non-pertanian. Atuh teu nyambung? Puguh wae teu nyambungna mah. Tapi da kitu usumna. Geura bandungan, Ir. Ellyn Subiantini, lulusan jurusan pertanian UNPAD taun 1987 oge tungtungna mah jadi distributor Multi Level Marketing (MLM). Samemehna, Ibu Ellyn wiraswasta muka loket pembayaran online jeung laundrydi imahna, Jl. Cimuncang Bandung. Eta oge kungsi Ibu Ellyn gawe jadi Kepala Produksi di pausahaan konsultan agribisnis. Ngan teu lana, da kaburu boga anak. “Damel di dinya teh mung opat taun. Saatosna ngalahirkeun, abdi liren, da teu tiasa ngantunkeun pun anak. Ongkoh deui perusahaanana ngawitan kolaps,” cek Ibu Ellyn bari tuluy netelakeun yen babaturan kuliah saangkatanana anu jumlahna leuwih ti saratus urang lolobana teu jaradi patani. “Anu janten juragan tani mah teu langkung ti sapuluh urang. Seuseueurna mah damel di kantoran. Aya nu janten padamel negeri, dosen, guru, pebisnis properti, ibu rumah tangga, padamel bank, sareng sajabina,” Ibu Ellyn ngajentrekeun.

Ir. Ellyn Subiantini.(sundaonline/egg)

Teu kasawang cenah lamun Ibu Ellyn kudu mitembeyan deui kana tatanen. Sualna, cek Ibu Ellyn, henteu minat bae, da usaha kana agribisnis mah perelu kaahlian jeung modal anu gede, sarta kudu siap gagal.  

Lian ti eta, cek Fajar, lahan pikeun tatanen beuki dieu beuki ngaheureutan, kabancang ku pabrik jeung padumukan. “Janten pantes seueur nu teu minat kana pertanian,” pokna.

Da jeung enyana, di Pakidulan Cianjur, nu barogaeun sawah jeung kebon the beuki ngurangan. Sawah jeung kebonna dijual ka urang kota, jadi ceungceuman geusan alaeun jaga sanggeus diwangunna jadi pabrik jeung padumukan. Malah teu jaga-jaga teuing, kiwari oge di Kacamatan Leles Kabupaten Cianjur geus dug-deg toko jeung mini market.

Ari pangna sawah jeung kebon dijarualan teh ku sabab butuh modal pikeun muka usaha sejen, atawa gawe ka luar negeri jadi Tenaga Kerja Indonesia (TKI). Di Pakidulan Cianjur mah hal sarupa kitu teh kawasna geus ngabaju. Satamatna sakola, barudak teh barangsiar ka kota neangan pagawean. Lamun hese meunangna, nya ngawayahnakeun jadi TKI, geusan kukumpul keur ngawangun imah anu sigrong bari mibanda titel haji atawa hajah. Peta sarupa kitu teh dijurungkeun ku kolotna. Lebah dieu kaciri, minat bangsa urang kana tatanen beuki ngurangan. Ayeuna mah lain pacul jeung kored. Anu dikeukeuweuk ku barudak di pilemburan hape, laptop, jeung gadget liana. Baheula mah barudak ka pasir rek ngadon ngored atawa ngarit jukut jang parab domba. Ayeuna mah ka pasir teh rek ngadon sms-an atawa teteleponan, da cenah di pasir mah alus sinyalna. Malah di kota mah loba barudak anu ti hudang sare nepi ka rek sarena deui ngan cindeten luhur kasur nyonyoo hape, atawa campego hareupeun laptop. Ana ditanya cita-citana teh walonna enteng pisan, “Aku mah mau bisnis online sajah.”

Ku sabab kitu meujeuhna seug satuluyna taya pisan barudak anu mikarep kana tatanen. Bet anu indung bapana tukang tani oge anakna mah mumul jadi tukang tani. Atuh komo incu jeung buyutna. [] Endang GG