Basa Roti Kaum Fakir Digembrong Sireum

Aya hiji fakir keur nyorang lalampahan anu panjang bari mawa buntelan anu eusina roti. Wanci burit manéhna nepi di hiji masjid. Manéhna ngarereb di dinya.

Isukna, rebun kénéh, manéhna nuluykeun lalampahanana. Leumpangna rada gancang. Kira-kira geus nyorang sapuluh mil, reg manéhna eureun. Rék reureuh heula bari ngadahar roti, cenah. Barang dibuka buntelanana, si roti téh digembrong sireum.

“Deudeuh teuing,” cék gerentes haténa. “Ieu sireum geus kabawa ku kuring, pajauh jeung batur-baturna anu aya di masjid,” gerentesna deui.

Bawaning ku karunya ka éta sireum anu ngagembrong roti dina buntelanana, éta fakir téh balik deui rék mulangkeun sakomplotan sireum ka tempatna di masjid téa. [] Endang GG