Sapotong Pizza Diburu Ku Balaréa

Ku lantaran bisa meuli sapotong, balarea muru Sapotong Pizza.| sundaonline.com

Sanajan asalna ti Itali, pizza geus jadi kadaharan nu dipikaresep ku urang Sunda. Beuki dieu réstoran pizza di kota-kota, di Tatar Sunda, ngalobaan. Ngan hanjakal, teu sakumna urang Sunda bisa ngasaan ni’matna pizza. Masalahna nya eta harga pizza salila ieu can kahontal ku masarakat leutik. “Pizza mah jajanan jalma jegud!” cek Mang Asur (59) urang Sukamukti, Katapang, Kabupatén Bandung, anu sapopoéna gawé jadi tukang bangunan. 

Ku kituna, Tatang Hidayat (25) jeung Anami Déra (24) nyieun pizza anu dingaranan Sapotong Pizza. Ku sabab mérekna Sapotong Pizza, nya dina emprona ogé Tatang jeung Anami bisa ngaladénan konsumen anu meulina ngan sapotong. “Dinamian Sapotong Pizza téh apan supados nyantél kana haténa urang Sunda,” cék Anami bari ngabelengéh seuri. “Sajabina ti éta supados balaréa sadunya arapaleun yén urang Sunda ogé tiasa ngadamel pizza,” pokna deui. 

Sapotong Pizza lain “pizza palsu” atawa “pipizzaan”. Tatang jeung Anami henteu asal-asalan nyieun Sapotong Pizza. Kualitas kalintang diutamakeun ku arinyana. “Geura mangga wé cobian,” cék Tatang, lulusan perhotélan anu resep ngulik kana kulinér. 

Da jeung enyana, cék sawatara konsumén anu ditepungan ku nu nulis, Sapotong Pizza rasana maknyos, mapakan pizza anu dijual di réstoran-réstoran pizza. Ku sabab kitu, teu anéh seug loba konsumén anu ngalanggan mareuli Sapotong Pizza. “Kanggé abdi mah teu cekap upami mésérna mung sapotong, da abdi mah hobi kana pizza téh, satungkulan saloyang ogé ku abdi mah séép,” cék Abdan, mahasiswa Unikom Bandung.

Abdan meuli Sapotong Pizza téh ari sakalieun balik ka imahna di Banjaran, Kabupatén Bandung. “Hanjakal Sapotong Pizza teu acan aya di Kota Bandung mah,” pokna bangun hanjelu.

Sapotong Pizza dipikaresep ku balaréa. Barudak TK, SD, SMP, SMA/SMK/MA, mahasiswa, nepi ka nini-nini jeung aki-aki, ti rupa-rupa kalangan masarakat loba nu deudeuieun meuli Sapotong Pizza. Tangtu waé lain ku lantaran hargana anu ngara’yat, tapi utamana mah bari jeung maknyos téa rasana. “Da sanaos mirah ogé ari rasana teu raos mah tangtos konsumén ogé karapokeun,” cék Anami basa ditepungan ku nu nulis di lapakna, di sisi jalan perumahan, Bumi Parahyangan Kencana, Kabupatén Bandung, pasosoré, Jumaah, 9 Juni 2017.

Sosis Sapotong Pizza. | sundaonline.com

Pépéroni Sapotong Pizza. | sundaonline.com

Sapotong Pizza kakara ngabogaan dua varian, nya éta sosis jeung pépéroni. Hargana, sosis sapotongna Rp 6 rébu, saloyangna Rp 30 rébu, pépéroni sapotongna Rp 8 rébu, saloyangna Rp 45 rébu. 

Sapotong Pizza mimiti dijual awal Désémbér 2016, di buruan mini markét, Jalan Soreang Banjaran, Kabupatén Bandung. Ngan ukur sabulan jualan di mini markét téh, da, cék Anami, kaburu lapakna dibuburak ku nu gelo. Padahal geus aya nu langganan meuli Sapotong Pizza ka dinya. “Teras wé ngalih ka Taman Kopo Katapang (TKK), nyéwa lapak di payuneun ruko anu muka salon,” Anami ngajéntrékeun. 

Alhamdulillah cenah di TKK tanggapan konsuménna saé. Padahal TKK masih kaétang coréngcang. Ruko ogé seueur anu kosong. Ngan hanjakal deui baé, salon anu nyéwakeun lapakna tutup, lapakna moal diséwakeun deui cenah. Kapaksa, sanggeus ampir lima bulan dagang Sapotong Pizza di TKK, Tatang jeung Anami néangan deui tempat anu merenah. Nya meunang deui tempat téh di sisi Jalan Tenjolaya, deukeut SMP Negeri 1 Cangkuang, Kabupatén Bandung. Tapi di dinya ogé teu lila, da barudak kelas salapan SMP-na kaburu ujian, barudak kelas dalapan jeung kelas tujuh kaburu peré. Antukna mah Tatang jeung Anami nyobaan ngalapak di Pasar Kagét Parken, Bumi Parahyangan Kencana, saban poé Minggu, ti isuk-isuk nepi ka beurang. 

Sanajan di Parken, upama usum hujan, jalanna nu renjul sok loba leutak jeung cileuncang, tapi ari omsétna mah hadé. Sapotong Pizza téh kajojo. Malah, nu pikahélokeun, palanggan ti mini market ogé aya nu ngahaja datang ka Parken rék meuli Sapotong Pizza. Nu matak reueus, cék Tatang jeung Anami, aya di antara palangganna anu jago nyieun pizza nepi ka ngacungkeun jempol. 

Tatang jeung Anami kalintang sukuranana ka Nu Maha Kawasa, sabab salila Romadon Pasar Kagét Parken dibuka. Waktuna ti bada Asar nepi ka Magrib. Alhamdulillah, saban poéna Sapotong Pizza maréma. Ngan, sabada lebaran, duka kumaha nasib Sapotong Pizza di Pasar Kagét Parken téh. Da apan sanggeus lebaran mah, Pasar Kagét Parken bukana saban poé Minggu wungkul. 

Booth Sapotong Pizza pikeun anu ngawaralaba. | sundaonline.com

“Insya Alloh abdi badé nyéwa ruko atanapi kios,” cék Anami anu di-aamiin-keun ku Tatang. Arinyana geus gilig rék bajuang nepi ka jadi pangusaha suksés. Malah, ti awalna, arinyana geus ngararancang Sapotong Pizza jadi waralaba. “Bilih badé ngawaralaba mangga Rp 25 juta. Pokona mah ku modal waralaba sakitu téh kantun der wé icalan,” cék Anami anu resep kana blogging jeung kungsi jadi guru bahasa Inggris. Pikeun jadi waralaba, Tatang jeung Anami geus ngadaptarkeun Sapotong Pizza ka Pemkab Bandung.

Jaga, arinyana boga impian, Sapotong Pizza bakal muka cabang di Kanada. [] Endang GG