Lima Jaga, Konci Hirup Sehat

Basa A. M. Isran ngabagikeun paradigma sehat ka balarea.

Gering mah geus tangtu, ngan sehat mah pilihan. Hartina, mun urang hayang salawasna sehat, nya wayahna urang kudu bajuang pikeun sehat. “Aya lima hal anu kudu diperhatikeun sangkan urang hurip waras teh,” cek A.M. Isran, BSC, MBA, Ph.D, basa pareng ngawangkong jeung sundaonline.com di imahna, Perumahan Guruminda Bandung.

Kahiji, Pa Isran ngajelaskeun, jaga hate jeung pikiran. Hate anu gumbira teh ubar. Lamun hate gumbira, nya pikiran oge kabawa positif sarta senang, moal kusut, moal marungkawut, jajauheun kana stres jeung depresi. Sangkan hate gumbira, urang kudu lapang dada, sarta sujud sukur dina sagala hal. Ulah sok humandeuar. Kudu ihlas narimakeun kana kaayaan. Saestuna, dina sagala kajadian teh ngandung kahadean ti Gusti Nu Mahasuci.

Kadua, jaga kalakuan ku ngajalankeun kahirupan anu jujur. Ulah sok kabitaan ku kaayaan atawa barang milik batur. Sing yakin, tiap jalma geus boga kulak canggeumna sewang-sewangan. Dug hulu pet nyawa tihothat melaan dunya barana bari ngahalalkeun sagala cara temahna awak anu katalangsara. Ulah sok ngumbar kahayang. Kudu ngukur ka kujur. Tong maksakeun nepi ka nganjuk ngahutang. Geus kajiret ku hutang mah hate jeung pikiran moal tenang.

Katilu, jaga kadaharan. Ulah tambarakan. Kadaharan anu alus nye ata kadaharan anu matak sehat. Ulah nepi ka ubar (obat kimiawi) jadi kadaharan, tapi kadaharan anu kudu jadi ubar. Kadaharan anu matak sehat nya eta kadaharan anu diala ku cara anu bener. “Tuh, tempo, nu alus mah cara daharna urang Advent,” cek A.M. Isran. Na kumaha kitu? Apan urang Adventmah vegetarian, kadaharanana sabangsaning tutuwuhan kayaning sayur-sayuran jeung buah-buahan, tara dahar daging sato. Da apan ti bareto oge geus aya papatahna, urang teh bakal kawas nu dipikiran ku urang, ari pikiran bakal kawas anu didahar ku urang. “Matakna, ulah sagawayah dina barangdahar,” pokna deui.

Kaopat, jaga kalenturan awak, ulah nepi ka awak urang rarengkeng. Carana? “Amalkeun Pijat Getar Syaraf jeung Senam Perkasa Indonesia,” cek A.M. Isran anu katelah Great Master Pijat Getar Syaraf jeungpenemu tehnik gerakan Senam Perkasa Indonesia.

Kalima, jaga pakean. Pikeun sehat, barangpake oge ulah asal pake. Pilih pakean anu teu matak ngaganggu kana kasehatan. Pikeun awewe, jilbab mangrupa pakean anu hade, sabab eta pakean buni jeung logor. Ku bunina pakean, sistim karinget dina awak urang bakal normal sakumaha mistina. Jadi kalembaban awak urang baris kajaga. Sabalikna lamun pakean ngaboleklak, awak urang bakal katojo langsung ku panasna panonpoe anu ngabalukarkeun kulit awak urang garing. Ku logorna pakean, sistim sarap dina awak urang oge bakal kapiara. Sabalikna lamun pakean urang sereg atawa merecet, sistim sarap dina awak bakal loba anu kapeureut. Matakna teu hade lamun urang make pakean anu ngepas, make beubeur atawa kaos kaki jeung sapatu anu meureut. Kaasup cingcin anu sereg oge teu hade kana kasehatan. Lian ti kitu, cek A.M. Isran, jaga pakean teh ngandung harti daek ngajaga naon-naon anu dipake ku urang. Upamana urang make sapedah motor. Tah, jaga eta motor teh sangkan alus dipakena. Lamun remna geus teu pakem, geuwat omean, da mun diantepkeun bisa jadi picilakaeun kana awak urang.

“Tah, lima hal anu tadi dicaritakeun teh disebutna Lima Jaga,” A.M. Isran alias Embah Pijat teh ngajentrekeun. “Lamun enyaan hayang sehat, eta Lima Jaga teh lain saukur diapalkeun tapi oge diamalkeun,” pokna deui. [] Endang GG