Loba nu Ngaku Muridna Nico Siahaan

Nico Siahaan jeung "murid-murid"-na. | sundaonline.com

Saha anu teu apal ka Nico Siahaan? Terrrrlalu! Apan Nico teh jalma kawentar. Kiwari, eta presenter kondang anu kasebut selebritis papan atas teh geus kapilih ku balarea jadi wakil ra’yat, nya eta anggota Dewan Perwakilan Rakyat Republik Indonesia (DPR RI) periode 2014 – 2019. 

Pangna bisa kapilih? Tangtu wae lain Nico anu kudu ngajentrekeunana, tapi anu milihna. Saha anu milihna teh? Nya saha deui lamun lain urang Kota Bandung jeung Cimahi. Hanjakal, basa kopean.com maluruh ka Bandung jeung Cimahi, taya nu daek ngaku salaku nu milihna. Duka ku naon make jeung embung ngaku. Pedah rahasia tea kitu. Anu tangtu mah loba anu mikareueus ka Nico teh. Urang sebut wae Ibu Maria Susanti jeung Teh Ia. Ieu warga Jalan Cibangkong Bandung mani galecok ari ngomongkeun Nico teh. Teu rek kitu kumaha, da pikeun Ibu Susanti jeung Teh Ia mah Nico Siahaan teh sasat dianggap guru. Lain guru biasa deuih, tapi guru luar biasa, nya eta guru husus dina public speaking. Jadi, dina hal public speaking mah Ibu Susanti jeung Teh Ia teh sasat muridna Nico.

“Sami abdi oge muridna Kang Nico,” cek Ibu Ani jeung Ibu Gustinemas, warga perumahan Griya Bandung Indah. 

“Abdi oge sami,” tempas Pa Drajat, S.Pd, guru SMP Negeri 1 Cangkuang Kabupaten Bandung.

“Saya juga,” Anami Dera, warga Sanggar Indah Banjaran Kabupaten Bandung ngacungkeun curukna.

Sihoreng loba warga Bandung Raya anu ngaku-ngaku jadi muridna Nico. Pangna kitu, apan Nico Siahaan teh kungsi ngayakeun training public speaking sacara haratis. Malah samodel Ibu Elly, Ibu Nina, Ibu Ani, Ibu Nemas, Ibu Susanti, Teh Ia, jeung Anami mah nepi ka dua kali miluan training-na oge. Kahiji poe Kemis, 28 Nopember 2013, basa diayakeunana di Gedung Dana Mulia, Jalan Cipaganti Bandung. Anu kaduana poe Jumaah, 27 Juni 2014, basa diayakeunana di Gedung Cahaya Garuda, Jalan Pasteur Bandung.

Nu matak nyugemakeun, cek maranehna, jaba ti haratis teh, nu miluan training dibere konsumsi anu maknyos, sarta sertipikat. Lamun ngahajakeun diajar ka sakola atawa tempat public speaking mah geus tangtu kudu boborot duit jutaan rupiah. Angot anu mere training-na jalma kawentar kawas Nico Siahaan mah. 

Tapi naha Nico bet balabah kitu? Cek “murid-murid”-na, hih apan Nico mah resep babagi. Elmu pangaweruh teh henteu dikemu ku sorangan, tapi dibagikeun ngarah balarea bisa ngala mangpaatna. Tong boro elmu public speaking, dalah elmu politik oge ku Nico rek diketrukkeun ka balarea anu hayang nyuprihna. Da jeung enyana, cek Anami, elmu anu dibagikeun ku Nico teh kacida munel eusina, tapi genah katampana, da Nico mawakeunana pikaresepeun.

Ka hareup Nico bakal ngayakeun deui training sarupa kitu. Tangtu wae eta “murid-murid”-na teh atoh, rek miluan deui bari mawa dulur atawa babaturanana. Meungpeung haratis, cenah. [] Endang GG