Lulusan SD Assalaam Bakal Pinter Nalar Qur’an

Karnaval ratusan siswa SD Assalaam Bandung.

Enya oge lain pasantren, pangurus SD Assalaam Bandung terus ngadorong siswa-siswina malar bisa nalar Al-Qur’an. Buktina, Saptu, 31 Mei 2014, ku alpukahna nu ngurus yayasan, SD Assalaam ngayakeun Lomba Tahfidz Qur’an di Aula SD Assalaam, Jalan Sasakgantung Bandung. “Ngayakeun ieu lomba teh supados barudak di SD Assalaam kahudang sumangetna pikeun tiasa nalar Al-Qur’an,” cek Pa Buldani, S.Pd.I, ketua panitiana eta lomba, ka sundaonline.com. 

Pa Buldani netelakeun, ku ayana eta lomba, siswa-siswi SD Assalaam, utamana kelas opat nepi ka kelas genep, enyaan kahudang sumangetna pikeun nalar Al-Qur’an. Eta we salila masa persiapan, nya eta tujuh bulan samemeh prungna lomba, barudak mani soson-soson ngapalkeun ayat-ayat suci Al-Qur’an. Malah waktuna pere sakola oge, barudak tetep datang ka sakola pikeun ngumpul ngariung di aula dina raraga latihan nalar Al-Qur’an. 

Alhamdulillah, dina prungna teh rame. Angot samemehna lomba digelar teh aya heula karnaval. Dina eta karnaval kira-kira 600 ratusan siswa-siswi SD Assalaam Bandung turun ka jalan, mapay-mapay Jalan Sasakgantung, Pasundan, Pungkur, Dewi Sartika, Balonggede, nepi ka ahirna di Sasakgantung deui hareupeun SD Assalaam. Eta ratusan barudak SD teh dibagi kana sababaraha pasukan. Nu panghareupna pasukan pemegang spanduk lomba. Tukangeunana pasukan berkuda. Aya salapan kuda nu dipake dina eta karnaval teh. Tukangeunana deui aya pasukan umbul-umbul, marching band, jeung sabangsana. Puguh wae ngondang perhatian balarea. 

Rengse karnaval, tuluy kana acara seremonial. Barudak tumplek di aula. Di luareunana para orangtua murid dariuk na korsi ngabandungan biantara ti para pupuhu Assalaam, di antarana Drs. K.H. Habieb Syarif Muhammad salaku Ketua Umum Yayasan Assalaam, Bapa Imanudin, M.Pd, salaku Kapala SD Assalaam, jeung Hj. Djulaeha, S.Ag, salaku pengawas ti Pamarentah Kota Bandung.

Para orangtua murid keur ngabandungan acara seremonial.

Sarengsena acara seremonial mah, prung lomba teh dilaksanakeun ti tabuh salapan isuk-isuk nepi ka tabuh opat sore. Aya salapan surat pondok anu dilombakeun teh. Q.S. Al-Qiyamah, Al-Muzammil jeung Al-Insan pikeun kelas opat. Pikeun kelas lima mah Q.S. Ar-Rahman, Al-Mulk jeung As-Sajdah. Q.S. Ya-Sin, Al-Kahfi jeung Al-Waqi’ah mah pikeun kelas genep. Alhamdulillah, anu jadi juara dina eta lomba baris meunang tropi bagilir katut duit ti Ketua Umum Yayasan Assalaam. “Ku kituna, pikeun hadiahna wungkul, yayasan nyadiakeun hadiah total Rp 15 juta,” cek Habieb basa mere biantara dina acara seremonial.

Aya 144 siswa anu milu kana eta lomba teh. Tim anu jadi jurina aya salapan. “Janten hiji surat teh hiji juri,” cek Pa Buldani. Demi nu jadi jurina nya eta ustadz-ustadz anom anu hafiz. 

“Ari hafiz teh nya eta jalmi anu tos tiasa nalar Al-Qur’an,” Habieb ngajentrekeun dina biantarana bari tuluy ngahiap salapan juri pikeun naek kana panggung sangkan dipikawanoh ku para orangtua murid.

Numutkeun rencana mah, Lomba Tahfidz Qur’an di SD Assalaam Bandung teh bakal diayakeun saban taun. Nya eta apan malar barudak bisa nalar Al-Qur’an. Salila ieu, lulusan SD Assalaam Bandung kakara bisa nalar Juz-Amma. “Saha nu terang, ku pinterna nalar Al-Qur’an, barudak teh jaranten murangkalih anu soleh sareng solehah, tiasa ngangkat martabat ibu ramana di dunya rawuh aherat,” cek Habieb kebek ku pangharepan. 

Memeh prung, peserta lomba dikumpulkeun di aula.

Anu kapeto jadi juara dina eta lomba teh nya eta:

Q. S. Al-Insan, juara I Regina Nadyah Salma kelas 4A, juara II Syifa Miftahul Jannah kelas 4B, juara III Azka Azidane kelas 4B, juara harapan Muhammad Nu’man kelas 4E.

Q. S. Al-Muzzammil, juara I Sarah kemala kelas 4D, juara II M. Fathan H. kelas 4A, juara III Syifa Khaerunnisa kelas 4B, juara harapan Adinda Calista N. A. kelas 4A. 

Q. S. Al-Qiyamah, juara I M. Agung G. kelas 4F, juara II M. Dzaki M. kelas 4B, juara III Raira Salsabila 4C, juara harapan Muhammad Rizki kelas 4C. 

Q. S. Al-Mulk, juara I Miftah Ghafar D. kelas 5B, juara II Izzat Abdillah kelas 5F, juara III Mirna Nurtazkiyah kelas 5B, juara harapan Agung Sri Mulyadi kelas 5A. 

Q. S. Surat Ar-Rahman, juara I Yasmin Nailah kelas 5B, juara II Fazwa Fahima kelas 5A, juara III M. Faikar Mufid kelas 5A, juara harapan Istifa Yurbi kelas 5B. 

Q. S. As-Sajdah, juara I Rifat Aqil Hanif S.P. kelas 5B, juara II Adam Arshan Aufar kelas 5E, juara III Aulia Shafa Ghallyah kelas 5A, juara harapan Fatia Rahmawati kelas 5A. 

Q. S. Al-Waqiah, juara I Thauriq Tri Nugroho Kelas 6C, juara II Rayhan Hanif Sutrisno kelas 6C, juara III Fahmi Maulana Arofah kelas 6A, juara harapan Azma Nuzula Laila kelas 6B. 

Q. S. Yaasiin, juara I Muhammad Ridwan Taufik kelas 6C, juara II Kania Dewi kelas 6B. 

Q. S. Al-Kahfi, juara I Pranata Alam kelas 6F, juara II M. Sholeh Al Ghifari kelas 6F, juara III Wina Febriani Sri Rezeki kelas 6B. 

“Anu janten juara umumna mah Sarah Kemala ti kelas 4D,” cek Buldani kaciri reueusna. [] Endang GG