Pare jeung Lauk di Kabupaten Bandung Surplus

Asep Sahdiana, Kasubag Publikasi jeung Pemberitaan Humas Kabupaten Bandung unggut-unggutan basa nyaritakeun perkara kurangna karep barudak kana tatanen teh. “Ti jaman urang oge tos kitu,” pokna ka sundaonline.com di tempat dinesna, Senen (9/6). “Aya dua hal anu ngalantarankeun barudak teu minat kana tatanen teh,” pokna deui.

Asep Sahdiana. (sundaonline/egg)

Kahiji, Asep ngajentrekeun, kurangna karep barudak kana tatanen teh ku lantaran pangaruh tina luhurna tingkat pendidikan. Apan, cek sakaol, saukur rek jadi tukang tani mah teu kudu sakola luhur-luhur. Malah teu sakola oge kaci, da moal ditanyakeun ijazah ari rek guyang leutak di sawah, atawa bobolokot di kebon mah. Kaduana, salila ieu nu kacaritakeun ngeunaan nasib patani di urang teh henteu nyugemakeun. 

Mimindengna anu didongengkeun teh sual rugina wungkul. Lebah untungna mah meh tara diuar-uar. Ku sabab rugi jeung rugi wae dongengna, atuh piraku teu rek bangbaungeun pikeun barudak.

Padahal, cek Asep, tatanen teh widang anu prospektif. Pohara kaliruna seug urang teu daek ngareret kana tatanen. Satungtung kumelip di kolong langit, urang butuh kadaharan. Ari kadaharan urang the apan hasil tatanen. Buktina, bawaning ku butuh, Indonesia nepi ka nguyang beas ka Vietnam, atawa nguyang kadele ka Amerika. Padahal Indonesia kungsi dilandih nagara agraris. Sanajan kitu, Asep netelakeun, Kabupaten Bandung mah tara kungsi kakurangan beas. Malah salila ieu Kabupaten Bandung bisa ngirim beas ka Jakarta. “Alhamdulillah, hasil panen beas sareng lauk di Kabupaten Bandung mah surplus,” cek Asep kebek ku kareueus.

Memang salila ieu pabrik jeung padumukan terus-terusan nyontang kebon jeung pasawahan, tapi hal ieu henteu berbanding lurus jeung anjlokna produktivitas pangan di Kabupaten Bandung. Pangna kitu, Asep ngeceskeun, Kabupaten Bandung boga udagan, nya eta hayang jadi daerah anu maju, mandiri, boga daya saeng dina sakabeh aspek kahirupan, kaasup dina perkara pangan. Ku kituna rupa-rupa tarekah dipilampah. Salasahiji tarekahna nya eta ngayakeun program Kawasan Rumah Pangan Lestari(KRPL). Ku ayana ieu program, tiap kulawarga di Kabupaten Bandung bisa pepelakan, sanajan ukur ngamangpaatkeun tepas atawa buruan anu heureut.    

Ngadenge ayana program samodel kitu, Fajar, mahasiswa tingkat ahir jurusan pertanian UNPAD langsung ngacungkeun jempolna. “Hebat ideuna,” pokna teh basa sms-an jeung sundaonline.com.

Cek Asep Sahdiana, intina mah urang ulah nepi ka pareumeun kreativitas. Matakna, “Robah cara pandang patani teh,” Asep niru kasauranna Bupati Bandung, H. Dadang Mohamad Naser, SH, S.Ip, M.Si.

Ulah luh-lah ku pedah teu boga sawah. Pikeun hasil tani anu mucekil, teu kudu pepelakan dina lahan anu lega wae. Lamun kreatif mah urang bisa mateahkeun lahan anu aya. Salasahiji carana nya eta ku ngalarapkeun hal-hal teknis dina program KRPL tea. Pikeun mere pangaweruh ka balarea dina perkara kreativitas tatanen, Kabupaten Bandung ngayakeun penyuluhan. Tangtu wae Kabupaten Bandung butuh loba pikeun tanaga penyuluhan teh. “Taun ieu oge Kabupaten Bandung bade ngarekrut saratus tanaga penyuluh,” cek Asep.    

Ku ayana penyuluhan dina perkara tatanen, dipiharep warga Kabupaten Bandung beuki mikaresep jeung mikareueus kana tatanen. Ku karesep jeung kareueusna, beh dituna warga Kabupaten Bandung bisa pepelakan jeung panen di buruan imahna sorangan. “Mun rajin pepelakan mah, meser cengek atanapi cabe oge teu kedah ngingkig ka warung, kantun metik bae di buruan. Artos jatah kanggo meser cengek atanapi cabena ditabungkeun,” Asep ngabelengeh seuri nyipta-nyipta obyagna warga Kabupaten Bandung dina perkara tatanen. [] Endang GG