Taun Ieu Jalan Cipelah Rek Diomean

Geus waktuna warga Desa Cipelah Kacamatan Rancabali Kabupaten Bandung ngucap sukur ka Yang Agung, sabab taun ieu Jalan Cipelah anu panjangna kira-kira lima kilo meter bakal diomean ku pamarentah. “Insya Alloh, taun ieu jalan di Cipelah bakal dilereskeun,” cek Asep Sahdiana, Kasubag Publikasi jeung Pemberitaan Humas Kabupaten Bandung ka kopean.com di tempat dinesna, Senen (9/6).

Asep ngaenyakeun, jalan di Cipelah kacida renjulna, teu matak genah seug dipake kandaraan. Angot usum hujan mah, jalanna leueur, matak paur upama make sapedah motor teh. Jabaning tanjakan jeung pudunanana kawilang ekstrim. “Dina usum hujan mah, kirang-kirangna tapis kana motor, matak remen tijuralit di Cipelah mah,” cek Kurnia Sudrajat, S.Pd, anu mindeng bulak-balik ti Cianjur ka Bandung ngaliwatan Cipelah. 

Padahal, cek Sudrajat, Jalan Cipelah teh kawilang penting, sabab jadi jalan strategis pikeun ngaronjatkeun produktivitas masarakat. “Apan abdi bulak-balik ti Cianjur ka Bandung teh reremenna mah dina raraga bisnis,” Sudrajat ngeceskeun. Ku sabab kitu, Sudrajat nuluykeun, ngomean jalan Cipelah mah geus pantes asup kana prioritas.

“Insya Alloh,” cek Asep Sahdiana.  “Perbaikan jalan di Cipelah tos diagendakeun,” pokna deui.

Asep netelakeun, lain ngamomorekeun kana pentingna jalan di Cipelah. Anu jadi pasualan salila ieu nya eta waragadna anu kawatesanan. Geura kieu jujutanana mah. Panjangna jalan di Kabupaten Bandung teh 3 rebu kilo meter anu ngawengku jalan propinsi, jalan kabupaten, jalan desa, jeung jalan perkebunan. Anu disebut jalan kabupaten panjangna 1.200 kilo meter. Ari kasanggupan waragad tina Anggaran Pendapatan dan Belanja Daerah (APBD) dina sataun teh ngan sapuluh persenna tina panjangna jalan kabupaten. Jadi kamampuhna APBD teh ngan pikeun 120 kilo meter jalan. ku sabab kitu,  Pamarentah Kabupaten Bandung nyieun skala prioritas dina prak-prakanana. Lian ti eta, sangkan kualitas jalanna alus, pamarentah oge nyieun program betonisasi. “Ari ngabeton tea apan waragadna langkung awis batan ngaspal,” cek Asep. Jadi, ngadagoan kagiliran perbaikan jalan teh karasa pisan lilana. 

Minangkana ieu jalan teh pangalusna di Cipelah mah.
KOPEAN/EGG

Paingan atuh ari kitu mah, matak nyeri beuheung sosonggeteun. Cek Ibu Tati, nu ngawarung di sisi jalan Cipelah, geus aya kana mangtaun-taun ruksakna jalan di Cipelah teh. “Da eta we, basa abdi sakola keneh di SD keneh oge tos awon jalan di dieu teh. Ayeuna abdi tos incuan,” pokna ngajentrekeun.

Tapi, Ibu Tati nuluykeun, hatur sewu nuhun laksa keti kabingahan, ari leres mah taun ieu Pamarentah Kabupaten Bandung bade ngadangdosan jalan di Cipelah. Aeh, lain Ibu Tati wungkul anu bungah teh. Sudrajat, warga Kabupaten Cianjur oge milu bungah, da puguh apan Cipelah teh napel wates jeung Kabupaten Cianjur. [] Endang GG.