Untung Urang Lain Kuda

Salasa, 3 Juni 2014, keur panas poe ereng-erengan, di Jalan Raya Soreang Banjaran Kabupaten Bandung, hareupeun Kantor Pos, katangen ti jauhna aya delman nu pinuh ku muatan tiguling, kudana ngarumpuyuk di tengah jalan. Kadenge sora jalma tingkoceak. Di jalan jadi macet, da loba jalma nu ngagimbung di tengah jalan. Beuki deukeut beuki sidik. Enyaan kuda bodas ngarumpuyuk. Panumpangna sawareh kapangpengkeun ka jalan. Atoh teu atoh basa motret eta kajadian teh.

Samemeh dipotret ieu kuda ngarumpuyuk heula.
SUNDAONLINE/EGG

Teu atohna, sabab kuring teu sempet motret kaayaan basa eta kuda ngarumpuyuk. Atohna, tetela eta kuda teh kuat. Cacakan geus ngarumpuyuk di tengah jalan, manehna bisa cengkat deui, tuluy lumpat deui ngangkut delman anu pinuh ku muatan. Enya sigana mah bawaning ku beurat teuing muatanana pangna manehna nepi ka ngarumpuyuk oge. Atuh da tukang delman mah aya kalana karooh kana muatan teh. Meh sarua jeung supir angkot. Lamun panumpang geus pinuh teh hayoh we sina pajejel panumpang teh. Teu mikirkeun kana kagenahan panumpang. Tapi ketang saruana nu jadi panumpang oge aya kalana teu mikir. Da lamun mikir mah tangtu embung didedet kawas barang dina angkutan umum.

Leuheung angkot kasebutna barang teu nyawaan. Ari kuda? Apan sidik kuda mah sasama mahluk ciptaan Alloh. Benerna mah urang kudu ngajenan ka sasama mahluk. Cek basa ayeuna mah, kita harus ramah lingkungan. Salasahiji bentuk tina ramah lingkungan teh nya eta nyaah ka sasama mahluk Alloh, kaasup ka nu jadi kuda.

Tapi abong jalma, dina telengesna sok leuwih telenges batan sato. Buktina nasib anu tumiba kana eta kuda. Sanggeus manehna ngarumpuyuk, apan kalah ka tuluy dipecutan sina cengkat deui bari awakna dibeungbeuratan ku delman anu aya panumpangan. Untung we aya sawareh panumpang anu kaluar tina delman. Jadi si muatan teh teu beurat teuing, tug ka eta kuda bisa cengkat deui.

Nu bener mah, seug si tukang delman boga rasa “kakudaan”, sakabeh panumpang sina kaluar heula tina delman. Delmanna oge leupaskeun heula tina kuda. Geus kitu kakara si kuda teh dihudangkeun. Tong sina hudang sorangan. Angot dipecut mah. Karunya. Geus puguh keur jagjagna diperes tanagana eta kuda teh. Cik atuh ari geus ngarumpuyuk mah ulah hantem wae dipecutan. Da pasti nyerieun kuda ge ari dipecut teh. Bisi teu percaya, geura coba awak urang sina dipecut ku batur. Untung nya urang lain kuda. Seug urang jadi kuda, nasibna moal bina ti kuda bodas anu ngarumpuyuk, saban poe bakal dipecutan bari sina lumpat mawa muatan. [] Endang GG