Di Kantin Vegetarian Teu Meunang Ngaremeh

Bewara di kantin vegetarian. | sundaonline.com

Ngarah nu dalahar teu ngaremeh, di kantin vegetarian mah aya aturan teu meunang ngaremeh. Eta aturan teh mangrupa bewara anu napel dina dingding, unina kieu: “Demi menghargai rahmat kasih Tuhan dan jerih payah petani, marilah kita berusaha untuk tidak menyisakan makanan di piring.”

Ku ayana bewara kitu di Kantin Vegetarian Taman Kopo Indah II Kabupaten Bandung, nya tangtu bae nu dalahar teh teu wanieun ngaremeh, da rata-rata nu dalahar di eta kantin barisaeun maca. Oge nu dalahar teu ngarasaeun kasigeung deuih, da enya kitu kuduna ari dahar mah ulah sok ngaremeh. 

“Abdi mah resep ningal bewara sapertos kitu teh. Sanes bae nu taruang di dieu janten teu ngaremeh, tapi oge eta bewara teh ngandung atikan budi pekerti anu luhur,” saur Yohannes Steve Tauran (48) anu geus langganan tuang di eta kantin.

Pa Steve anu sapopoena sibuk salaku ahli terapi polarisasi netelakeun, sikep dahar anu bener  teh cirining jalma anu alus ahlakna. Ari jalma anu alus ahlakna apan jalma anu teu weleh luyu tingkahna sareng pangersa Gusti Nu Mahasuci. Ku kituna, hade pisan seug ti leuleutik barudak teh geus diatik ku conto-conto perilaku anu bener. “Kedah ku conto anu nyata ngatikna, ulah ngan ku cariosan wungkul,” tandesna.

“Leres pisan, saur pun nini oge ngaremeh teh kalakuan anu teu sae,” saur Pa Gyan Grihasti (46), vegetarian ti Banjaran Kabupaten Bandung anu tos ngalanggan tuang di Kantin Vegetarian. “Matakna ti leuleutik abdi mah tara nyesakeun tedaeun ari keur neda teh. Upami disuguhan leueuteun oge tara disesakeun ku abdi mah. Kantenan upami leueuteunana cikiruh samodel jus, cisusu, cikopi, cienteh mah, pasti ku abdi diseepkeun. Sualna hawatos ka nu nyayogikeunana upami teu diseepkeun teh,” eta instruktur senam yoga teh ngajentrekeun kalayan daria.

Atuh meureun lalening piring urut dahar vegetarian mah? “Ah, henteu kitu oge,” cek Ci Noli anu ngokolakeun kantin vegetarian. “Aya piring-piring tilas tuangna vegetarian anu masih bala oge,” pokna deui.

Aeh, naha kitu? “Sumuhun da apan piringna bala ku tisu, siki cabe, panusuk sate, jeung sabangsana,” Ci Noli ngajentrekeun bari ditungtungan ku ngehkey. [] Endang GG