Hayu Urang ka Poli Gigi Gratis

Riska keur meresihan karang gigina Ibu Maya.

Geus lila hayangna ka dokter gigi teh. Tapi Ibu Maya (46) wegah ku antrina ari ka Puskesmas mah.  Da geuning rebun keneh oge di Puskesmas mah geus ngagimbung jalma nu rek ngubaran huntuna teh. Ku kituna, Ibu Maya kacida atohna basa nampa beja ti anakna yen aya  poli gigi anu alus pelayananana bari jeung gratis. “Enyaan eta teh?” eta warga Desa Nagrak Kacamatan Cangkuang Kabupaten Bandung teh masih ngemu kacangcaya. Meujeuhna rek teu percaya oge, da nu kasebut gratis mah biasana leuwih pagegelek jeung sok teu hade pelayananana.

“Enyaan atuh, Ibu, ieu mah moal antri, da patugas anu marios sareng ngubaranana oge seueur. Pokona Ibu sumping ka ditu, moal lami langsung dipanggil sareng ditindak ku patugasna,” Nam (21) ngayakinkeun Ibu Maya nu jadi indungna. “Upami bade, ayeuna urang daptarkeun via SMS,” pokna deui.

“Daptar via SMS?” Ibu Maya curinghak.

“Sumuhun via SMS kangge jangjian nangtoskeun waktosna. Tuh, nya, di dieu mah daptarna oge Ibu teu kedah antri.” Nam ngayakinkeun deui. “Kumaha, bade?” Nam ngadesek indungna.

Ibu Maya unggeuk. Isukna, Rebo, 11 Juni 2014, Ibu Maya katut carogena ka Poli Gigi anu pernahna di Jalan Eyckman 40 Bandung. Barang sup ka gerbangna, Ibu Maya katut carogena anu tumpak sapeda motor teh langsung dibageakeun ku Satpam anu someah.

“Bade diparios waos? Tos jangjian heula teu acan?” cek Satpam. Ibu Maya unggeuk. Tuluy ku Satpam dituduhkeun tempat pamariksaanana. Teu lali, Satpam oge nuduhkeun tempat parkir anu gratis di palebah tempat pamariksaan gigi.

Teu kungsi lila, sabada ngeusi buku tamu (pasen), Ibu Maya katut carogena dipanggil, dibawa ka jero ruangan pamariksaan gigi. Tetela, enyaan loba patugasna teh. Paingan si pasenna teu kudu pagegelek antri kawas di Puskesmas. Patugas anu rek mariksa pasen teh pikayungyuneun. Jaba ti gareulis jeung karasep teh, saromeah jeung darehdeh deuih.

“Ibu kantos diberesihan karang gigi?” Riska Agustiatuti (20) nanya ka Ibu Maya.

“Teu acan, Neng,” walon Ibu Maya. “Kumaha kitu?”

“Sawios ayeuna we urang beresihan, nya Bu,” cek Riska bari tuluy pakepuk leungeunna maenkeun pakakasna.

Sajeroning pamariksaan, Riska oge mere katerangan ngeunaan cara-cara ngarawat gigi anu bener, kaasup cara nyikatna. Hadena, cek Riska, nyikat gigi teh sapoe dua kali, nya eta peuting samemeh sare, jeung isuk-isuk sabada sarapan. Insya Alloh, lamun bener ngarawatna, waos teh moal karangan, oge moal liangan.

Sanggeus aya kana sajamna, waos Ibu Maya anu mangtaun-taun karangan teh jadi beresih deui. Tapi, cek Riska, Ibu Maya hadena rajin kontrol ka poli gigi. “Mending dirawat waos teh, tibatan ngangge waos palsu mah,” Riska ngawawadian. “Pokona diantos deui kasumpinganana,” Riska ngasun panangan Ibu Maya basa anjeunna pamitan. Tangtu wae, saur Ibu Maya, batan kapok mah kalah ka gawok kana pelayananana eta poli gigi teh.

“Pami teu percanten mah, geura jung buktoskeun ka ditu,” saur Ibu Maya bari tuluy netelakeun yen eta poli gigi gratis tapi hade pelayananana teh dibuka pikeun umum. Istri, pameget, murangkalih, sepuh, mangga geura ngabring ka ditu. Insya Alloh pasti dibageakeun ku para patugasna kalayan nyugemakeun.

Tapi naha bisa gratis? Sualna, para patugas anu mariksa jeung ngubaranana teh barudak mahasiswa Poli Teknik Kesehatan (Poltekkes) Bandung jurusan keperawatan gigi anu keur praktek, tur butuh ku balarea anu rela jadi pasen-pasenna. [] Endang GG