Awak Sehat Perkasa ku SPI

Senam Perkasa berjamaah di Sanggar Indah Banjaran.

Ngarah sehat perkasa, coba leukeunan Senam Perkasa Indonesia (SPI). Ku ngalaksanakeunana saminggu tilu kali 20 menit, insya Alloh awak urang bakal kuat, moal gampang katarajang ku panyakit. SPI teh mangrupa hasil tina eksplorasi jeung optimalisasi tehnik gerakan solat. Ari gerakan solat apan geus aya ti jamanna Nabi Ibrahim, Nabi Musa, Nabi Daud, Nabi Sulaeman, Nabi Ayub, Nabi Zakaria, Nabi Isa, tug ka sakabeh gerakanana ngumpul di Nabi Muhammad.

Eta gerakan solat teh ditalungtik jeung diulik ku A.M. Isran, BSC, MBA, Ph.D, tug ka ahirna dingaranan SPI. Ari kecap PERKASA mangrupa kancahan tina Phisikal, Emosional, spiritual, aKAl, jeung SeksualitAs. Ti taun 2000 ieu senam geus sumebar ka sakuliah nusantara, malah nepi ka mancanagara. Aya sapuluh gerakan atawa jurus dina SPI. Tiap gerakan ngandung hasiat anu kalintang gedena pikeun kasehatan awak urang. 

Ngan poma ulah salah paham. Nu awam sok nyebutkeun SPI teh solat anu disenamkeun, atawa senam anu disolatkeun. Sakali deui, tong lepat paham. Eta anggapan anu salah alias teu bener. [] Endang GG