Di Kabupaten Bandung, Aya keneh WC Kantor anu Kotor

WC di kantor desa. | sundaonline.com

Harita teh kuring hayang kahampangan. Untungna aya kantor desa di wewengkon Margahayu Kabupaten Bandung. Moal disebutkeun ngaran kantor desana mah, bisi pajarkeun mencermarkan nama baik. Sup kuring ka eta kantor, tuluy nanyakeun jambanna. Ku patugas kuring dituduhkeun ka tukang. “Kaluar teras ngenca,” pokna.

Pantona bolongor. | sundaonline.com

Enya bae jambanna teh aya di luar kantor. Barang sup ka WC-na, dadak sakala pikiiheun teh leungit. Maksud kuring rek kahampangan teh teu kebat, sabab kaayaan WC-na teu pikaresepeun alias rujit pikageuleuheun. WC teh pantona bolongor, kotor, runtah ngagunduk meh di unggal juruna.

“Aneh. Ari anu digarawe di ieu kantor kumaha buang hajatna?” hate kuring ngagerentes. “Atawa tiap hayang buang hajat maranehna baralik heula ka imahna?” kuring geuwat indit sanggeus motretan eta WC.

Bala ku runtah. | sundaonline.com

Jadina mah kuring ka WC pom bensin anu di Jalan Dengdek Kopo Kabupaten Bandung. Teu alus-alus teuing WC di pom bensin oge, ngan henteu sarujit WC di kantor desa. [] Endang GG