Hayang Meuli Buku, Dagang Gurilem

Asep Maulana Nur jeung Ibu Vegetarian. | sundaonline.com

Pasosore di hareupeun Vihara Taman Kopo Indah II Kabupaten Bandung aya hiji budak lalaki dikaos oblong bari ngagandong kantong palastik gede nyampeurkeun ka ibu-ibu anu keur meuli asakan vegetarian di eta vihara. “Bade gurilem, Bu?” eta budak teh nawarkeun barang anu digandongna. “Geura mangga cobian, raos seuhahna, Bu,” pokna deui bari seuri marahmay.

“Sabaraha?” si ibu vegetarian teh nanya.

“Tilu rebu rupia sabungkusna,” walon eta budak mani haget. “Bade sabaraha bungkus, Bu?” eta budak anu ngaranna Asep teh langsung cingogo rek ngaluarkeun gurilem tina wadahna anu gede.

“Ah, dua bungkus we,” saur ibu vegetarian bari song ngasongkeun duit pas genep rebu rupia.

Asep geuwat nampanan tuluy manehna ngasongkeun dua bungkus gurilem ka ibu vegetarian. Kitu kagiatan Asep saban poeana sabada nyuprih elmu di Madrasah Tsanawiyah Thalibin Margahayu, Kabupaten Bandung. “Lumayan lah, tina sabungkusna abdi kenging bati lima ratus rupia. Upami dagang ti tabuh dua dugi ka magrib sok pajeng antara 30 dugi ka 40 bungkus,” cek eta budak anu ngaran lengkepna Asep Maulana Nur.

Ieu budak tamatan SD Negeri VI Angkasa Kabupaten Bandung teh geus mitembeyan kana ngider dagang gurilem ti lebaran taun 2012. Pangna daek luut-leet kesang natawarkeun gurilem di jalanan ku sabab manehna perelu nyumponan pangabutuhna di sakola. Da cenah pangabutuh sakola teh lain SPP wungkul. Buku, alat tulis, ongkos ti imah ka sakola oge kudu make duit.

Asep teh anak bungsu tina opat dulur. Lanceukan nu kahiji jeung nu kadua geus kurenan. Lanceukna anu katilu mah masih sakola di SMA. “Tapi, raportpun lanceuk mah katahan di sakola, da masih aya tunggakan SPP,” Asep nikukur nyaritakeun kaayaan kulawargana. Ngan kituna bari nyerengeh. Bapana Asep sapopoena jadi kuli bangunan di luar kota. Indungna dagang tutut. Samemeh dagang tutut, indungna oge dagang gurilem. Tapi, ti saprak Asep dagang gurilem, indungna banting setir kana dagang tutut. “Duka ku naon,” cek Asep ditungtungan ku seuri.

Resep cenah dagang teh. Jadi boga duit sorangan. Jadi teu kudu nyusahkeun wae ka indung bapa. Jadi pinter matematika, da unggal poe ngitung wae pibatieun. Jadi loba baraya, da pelangganna tambah loba. Jadi teu era lamun ku guru dititah maju ka hareup, da Asep geus biasa natawarkeun gurilem ka balarea. Ku sabab kitu, Asep mah moal eureun kana dagang teh. Malah nepi ka geus tamat sakola oge rek dagang we kawas Nabi Muhammad. “Da cita-cita abdi mah hoyong janten pangusaha anu sukses,” cek Asep kebek ku pangharepan. [] Endang GG