Kaendahan Bandung Pangorbanan PKL

Tio | sundaonline.com

Cik keneh warga Bandung milangkala kotana anu ka 204 taun. Sanajan geus loba kamajuan di Kota Bandung, acara milangkalana mah basajan bae. Lamun cek basa malayuna mah meureun murah meriahtea. Ayeuna mah loba warga anu mikareueusna. Sabada dipingpin ku Walikota Ridwan Kamil, loba warga anu nyebutkeun yen Bandung geus pantes deui dilandih Kota Kembang. Geura mangga jalan-jalan ka puseur kotana. Anu baheula dimotokeun Bandung berhiber (bersih, hijau, berbunga), jeung genah, merenah, tur tumaninah teh kakara ayeuna karasana.

Ayeuna mah loba kagiatan warga anu museurna kana kaendahan kota Bandung. Kagiatan samodel Jumsih(Jumat Bersih) oge hirup deui, tur katara sarta karasa nyatana. Kawas di lingkungan Kacamatan Astanaanyar buktina. Saban poe Jumaah kaayaan di jalan teh lenglang. Nu laleumpang sisi jalan bisa kalayan genah, merenah, tur tumaninah tea, sabab di trotoar taya nu dagang. Malah Pasar Astanaanyar oge pere. Naha bisa nepi ka kitu? Awahing ku alus pamingpinna? Bisa jadi kitu.  

Nu pasti, kaendahan Kota Bandung moal ngajanggelek seug teu dirojong ku balarea. Loba rahayat anu ngorbankeun kapentingan pribadi demi ngawujudna kaendahan Kota Bandung. Buktina saban Jumsih di Astanaanyar tea. Loba PKL (Pedagang Kaki Lima) anu teu jualan. Sapoe eta mah maranehna ngawayahnakeun henteu nampa kauntungan tina pakasabanana salaku PKL.

“Mangkaning lumayan kauntungan sadintenna teh,” cek Tio, padagang DVD di Jalan Astanaanyar Bandung. Tapi keun bae, cenah, ari enya mah balarea di Kota Bandung jadi ngarasa genah, merenah, tur tumaninah mah. Ngan pikeun nutupan karugian saban poe Jumaah, Tio kapaksa muka cabang usahana di Kota Sumedang.

Duka sabaraha jumlah PKL sakota Bandung. Lamun jumlah PKL nepi ka ngarebu, atuh lain lumayan deui waragad pikeun ngaendahkeun Bandung dina sapoena! Ana kitu mah waragad pikeun ngawujudkeun kaendahan kota teh lain murah meriah. Bener cek papatah, aya harga anu kudu dibayar pikeun ngahontal hiji udagan. [] Endang GG