Loba Motoris Teu Apal kana Tatakrama

Mang Nanang

Rebo (17/9) tabuh dalapan isuk-isuk kuring indit ti Banjaran rek Setrasi Plaza Bandung. Ngahaja indit tabuh sakitu teh ngarah rada lowong di jalanna. Ari pek, ku sabab aya sababarha titik jalan anu keur diomean, ti Jalan Gandasari Kabupaten Bandung keneh oge macet. Angot di Jalan Dengdek Kopo mah. Cacakan kitu, jelema teh angger bae paheula-heula ari mawa mobil atawa sapedah motor teh. Malah, lebah Sukaleueur, aya lalaki tengah tuwuh anu seseledek nyiap beulah kenca, tug ka manehna nubruk kuring anu aya hareupeunana.

Kangaranan katubruk sapedah motor, atuh nya puguh nyanyautan awahing ku nyeri mumuncangan suku beulah kenca teh. Keun, kuring sadar, da kitu resikona di jalan mah. Nyeri mumuncangan mah bisa diubaran. Ngan aya kanyeri anu rada hese diubaranana, nya eta sikep si lalaki anu nubrukna. Manehna boro-boro ka hayang nyaho kana mumuncangan kuring anu keur nyanyautan. Menta dihampura oge henteu. Sanggeus nubruk jeung ngarandeg sakedapan teh manehna langsung bae ngabengbeos.

Paingan atuh Mang Nanang (64) kantos misaur, ayeuna mah beuki loba jalma anu teu paduli ka sasamana. “Enya kapadulian sosial teh geus luntur. Meh saban jalma ngutamakeun egona sewang-sewangan,” eta pelukis anu pangsiunan guru ti SMP Negeri 36 Bandung teh ngajentrekeun.

Buktina, saur Mang Nanang, di jalan raya ari sakalieun keur leumpang, sok mindeng kagok ku nu marake sapedah motor. Da geuning ayeuna mah anu marake sapedah motor teh loba nu teu apal kana tatakrama. Jalan tempatna nu keur laleumpang teh disabot ku nu marake sapedah motor. Malah ari keur macet nu marake sapedah motor teh hanjat kana trotoar. “Hal sarupa kitu teh apan geus nembongkeun gorengna ahlak jalma kiwari. Saur sepuh kapungkur mah, jalma anu teu apal kana tatakrama atawa tata titi teh disebutna jalma belegug,” Mang Nanang semu ngageremet. [] Endang GG