Nu Liwung Ku Gula Kawung

Gula kawung di super market. SUNDAONLINE/EGG

Gula beureum geus jadi pangabutuh. Ngan hanjakal hargana mahal. Angot meulina di super market mah. Kawas di Hiypermart Miko Mall Kabupaten Bandung, harga gula beureum Rp 9.390 per 100 gram, alias Rp 93.900 sakilona. “Tapi da ieu mah asli gula aren,” cek hiji lalaki pagawe di eta super market.

“Atuh nya muhun kedah asli,” tempas ibu-ibu bari ngarampaan gula anu ngagelar di dinya.

Si pagawe teh ngabelengeh seuri. “Jabaning ieu mah gulana super jumbo,” pokna deui.

Gula aren teh gula kawung tea. Disebut asli dumeh waktu dijieunna teu kacampuran ku kalapa atawa bahan anu sejenna. Ibu-ibu anu ngarti kana kasehatan pasti neanganana gula kawung anu asli, da lamun kacampuran kalapa mah inggis jadi kolesterol anu ngaganggu kana kasehatan. “Ngan hanjakal pangaosna mani awis kitu,” pok deui ibu-ibu teh nyarita kitu. “Segut teuing ngeruk untungna anu dagang teh,” pokna deui rada kutuk gendeng.

Anehna, mahalna gula kawung teh teu matak jegud pikeun nu nyieunna mah. “Paling ageung oge ti abdina mah Rp 10 rebu,” saur Ibu Rusmini anu sok nyieunan gula kawung di Pakidulan Cianjur.

“Sumuhun di dieu oge sami,” saur Pa Dayat urang Cipelah Kabupaten Bandung anu salila ieu Cipelah katelahna sentra gula aren.

Padahal nyieunna mah kaitung leukleuk. Geura mimitina teh apan kudu nyadap, ti subuh nepi ka burit. Tuluy hasil sadapanana—anu disebut lahang—teh diolah di hawu, diaduk-aduk tug ka ngahasilkeun peueut. Geus kitu dicitak kana citakan. “Ah, kirang-kirangna mah matak seunggah ari bade ngadamel gula teh. Kantenan bari dipasihan nyeri awak atawa cangkeul panangan mah,” saur Ibu Rusmini. Enya cenah cangkeul wae pananganna balas ku remen ngaduk-ngaduk pigulaeun di hawu.

Ari geus jadi gula mah memang gampang ngajualna, da geus aya bandar nu rek nampana. “Ngan asa ku kacida nya si bandar teh, ari meuli ka abdi ku harga anu murah, ari tempona dijual ka batur mani sakitu mahalna,” Pa Dayat rada ngageremet. [] Endang GG