Nu Tétérékélan Tengah Peuting

Pa Saépudin jeung Pa Jajat. | Foto EGG

Basa kuring nyimpang ka pom bénsin di Jalan Otista Bandung, Saptu (30/8), tabuh hiji isuk-isuk, aya nu matak pikareueuseun ogé pikasediheun. Enya éta Pa Saepudin (34) jeung Pa Jajat (40). Eta dua pagawé pom bensin téh kasampak keur aya luhureun tarajé anu jangkungna tujuh meter. Maranéhna keur ngoméan palapon anu ruksak. Pikareueuseunana duméh katempo maranéhna boga anléh anu sakitu hadéna, geus kawilang ahli dina urusan tuak-taék jeung uma-omé bangunan anu ruksak.

“Sakieu mah kaétang déét atuh. Kapungkur mah, jaman damel dina proyék pembangunan apartemén, abdi kantos ucang anggé dina lanté tilu puluh,” cék Pa Saépudin reueus. Tapi teu sing paur ngagawéan apartemén mah, sabab alat-alatna matak aman. “Nu pikapaureun di nu kieu,” pokna bari nyekel kana tarajé.

Kungsi cenah éta tarajé ngagorolong tuluy ngagubrag malang ka jalan. Untung baé éta tarajé teu ninggang ka jelema. Ogé untungna deui Pa Saépudin katut baturna geus turun tina éta tarajé. “Paur nganggé tarajé modél kieu mah,” pokna deui.

Tengah peuting tétérékélan. | Foto EGG.

Tapi dalah dikumaha, da geus kitu tugasna Pa Saépudin jeung Pa Jajat mah. Ku kituna, maranéhna geus teu mikiran kapaur. Nu penting éta pancén ti nu jadi dununganana bisa kapilampah kalayan bener. Mikiran kapaur mah atuh moal aya jang ka dapur, cenah.

Pa Saépudin téh aslina mah ti Ciranjang Cianjur. Istrina katut tilu anakna mah cicingna di Ciranjang. Pa Saépudin mulang ka Ciranjang dua minggu sakali maké beus. Jadi salila digawé di Bandung téh Pa Saépudin mondok moékna di pom bensin, tempatna digawé, da aya kamar disadiakeun ku dununganana. Sarua Pa Jajat ogé. Ngan ieu urang Tasik mah tacan kurenan alias masih jajaka. Jadi mulangna ka lembur ogé sakarepna baé.

Lain teu hayang ngumpul saban poé jeung kulawarga téh. Tapi dalah dikumaha da geuning kieu nyatana. “Demi nyiar kipayah, abdi kudu jauh ti kulawarga,” cék Pa Saepudin anu boga cita-cita hayang nguliahkeun anak panggedéna anu ayeuna keur sakola di SMA.

Tapi, duka kumaha pikahareupeunana, nu tangtu gajih nu katampa tiap bulan ku Pa Saépudin téh ngan Rp 1,5 juta. Lian ti gajih taya deui panghasilan, da istrina di lembur éstuning asli ibu rumah tangga. Mun dipikiran mah matak jangar. “Kumaha béhna baé,” cék Pa Saépudin bari ngaléos da kaburu digupayan ku Pa Jajat anu rék ngajak dahar saté di émpér Jalan Otista. [] Endang GG