Nyoo HP di Pom Bensin

Si Aa Operator anteng nyoo HP di pom bensin.
SUNDAONLINE/EGG

Basa kuring nyimpang ka pom bensin di Jalan Otista Bandung, Saptu (30/8), tabuh hiji isuk-isuk, aya nu matak pikaseurieun. Enya pikaseurieun teh datangna ti operator pom bensin. Abong loba nangkring, tamba kesel bari ngadagoan konsumen, manehna anteng nyoo HP. Padahal sidik ngahurungkeun handphone (HP) di pom bensin teh kacida dipahingna. Baheula, basa muka HP rek maca SMS di pom bensin kuring kungsi ditegor ku operator.  “Pak, lihat, itu larangan tidak boleh menggunakan HP di sini,” pokna.

Puguh bae kuring kacida erana ditegor kitu teh, da puguh enya ngarempak aturan. Tapi, naha itu si Aa Operator bet kalah ka nyoo HP di pom bensin teh? Pedah tiiseun arang konsumen anu datang? Enya oge kitu apan geus sidik nyoo HP di pom bensin mah teu meunang.

Abong orang dalam. Enya meureun jadi orang dalam mah kaci ngarempak aturan teh, nya. Tapi, kajeun najan kuring lain orang dalam oge. Nu penting kuring bisa motret si Aa eta. Ngarah jadi eunteung pikeun balarea yen kitu peta teh salah.

Ku kituna, neda agung cukup lumur, neda jembar sihaksami, hapunten anu kasuhun, kuring motret si Aa eta make HP. Kuring oge apal, motret jeung ngagunakeun HP di pom bensin teh dilarang. Tapi atuh da kapaksa, kuring hayang motret si Aa operator anu anteng nyoo HP di pom bensin. [] Endang GG