Rea Umat Islam nu Mopohokeun Ayat-ayat Kauniyah

Pikeun Yayasan Wong Cilik Menulis (WC-M) mah program wakaf Alquran teh geus jadi panineungan. Kahayang mah manjang tug ka ayeuna jeung satuluyna. Ngan antara kahayang jeung kanyataan teh geuning teu salawasna parok. Padahal tug ka wangkid ieu masih loba Alquran di masjid-masjid anu geus barutut jilid jeung keretasna. Malah aya di hiji masjid di padesaan anu Alquranna geus marekplekan upama disuay-suaykeun teh. Tah, hal ieu matak ngerik kana ati. Ku kituna, bulan Romadon taun 2012 WC-M ngayakeun program wakaf Alquran. "Alhamdulillah, harita eta program teh meunang pangdeudeul ti penerbit anu medalkeun rupa-rupa model Alquran," saur Pa Drajat, M.M.Pd, salaku Wakil Ketua WC-M basa ngawangkong jeung sundaonline.com di sekretariatna, Sanggar Indah Banjaran Kabupaten Bandung, 

Pa Drajat netelakeun, ku minimal Rp 100 rebu urang bakal meunang dua eksemplar Alquran anu modelna leuks, nya eta Alquran edisi ilmu pengetahuan (Al-‘Alim), jeung Alquran edisi seribu doa (As-Salam). Eta dua eksemplar Alquran teh anu hiji pakeeun pribadi, anu hijina deui pikeun wakafkeuneun. “Mangga wae ngawakafkeunana mah bade ku nyalira oge. Bade nitip wakaf ka WC-M mangga deuih. Upami baraya bade ngadaptarkeun calon penerima wakaf Alquran oge mangga. Ngawakafkeunana mah tiasa ka TPA, masjid, panti asuhan, pakampungan miskin, daerah mencil, sareng sajabina ti eta,” saurna.

 Al-‘Alim jeung As-Salam teh Alquran-Alquran keneh. Bedana, dina Al-‘Alimmah ayat-ayat kauniyah (ilmu pengetahuan)-na ditandaan (di-high light), ari dina As-Salam mah ayat-ayat anu ngandung du’a anu ditandaanana. Ieu tanda teh pikeun nu maca Alquran gampangeun neangan ayat-ayatna. Ngan saheulaanan mah tarjamahanana dina ieu Alquran teh make basa Indonesia. “Sugan ka payunna mah tarjamahna aya nu ku basa Sunda,” saur Pa Drajat.

Pa Drajat anu sapopoena ngajar matematika di SMP Negeri 1 Cangkuang Kabupaten Bandung oge mairan, umat Islam geus sawadina ngaji ayat-ayat kauniyah. Ngan hanjakalna, salila ieu kalah ka bangsa deungeun anu ngaji jeung neuleumanana, tug ka antukna parapenemu atawa parailmuwan oge jebulna leuwih loba ti bangsa dengeun. “Tah, ieu kanyataan teh deuih jadi pangdorong pikeun WC-M ngayakeun program wakaf Alquran.” eta jebolan UPI Bandung jurusan Fisika anu geus nulis rea buku matematika best seller teh ngajentrekeun. “Padahal, ayat-ayat kauniyah dina Alquran teh seueurna lima kalieun ayat-ayat fiqih,” pokna deui.

Al-‘Alim dieditoran ku Prof. Dr. Rosihon Anwar, M.Ag, Guru Besar Tafsir Universitas Islam Negeri Bandung. Insya Allah Al-‘Alim mangrupa model munggaran, tur hiji-hijina di Indonesia. Lian ti eta, dina ieu Alqur’an aya pangjajap husus ti Dr. Agus Purwanto, ahli fisika, pengkaji Alquran, oge penulis buku Ayat-ayat Semesta. Prof. Dr. Mulyadhi Kartanegara, Guru Besar Filsafat Universitas Islam Negeri Jakarta oge milu mairan dina hal konsep elmuna. Ku kituna, meujeuhna ieu mushaf Al-‘Alim meunang pangbagea ti Prof. Dr. Mohammad Nuh salaku Menteri Pendidikan dan Kebudayaan RI, oge pangbagea ti balarea.

Basa WC-M nyalurkeun wakaf Alquran ka Pakidulan Cianjur, 19-20 Juli 2012, masarakat di ditu pohara bungahna. Rek teu bungah kumaha, da puguh urang Pakidulan Cianjur mah kawilang hese rek barangbeuli ka kota teh, kaasup meuli Alquran. Sualna, seunggah di jalanna ari rek ka kota teh, da rea jalan anu butut: geus taun-taun teu diomean wae, kawas jalan ti Cigadog ka Cukanggaleuh, atawa ti Cukanggaleuh ka Desa Sirnasari, Kacamatan Leles. “Tah, daerah mencil model kieu mangrupa salasahiji target dina ieu program,” Pa Drajat netelakeun.

Ku sabab nyieun kahadean mah teu diwengku ku bulan Romadon bae, ku kituna ieu program wakaf Alquran teh insya Allah kahayang mah hirup deui, cenah. [] ram