SPI, Senam Yoga Islami?

Basa Gyan Grihasti (46) ngapresentasikeun sapuluh gerakan Senam Perkasa Indonesia (SPI) ka babaturanana, Yohannes Steve Tauran (48) mah henteu ngarasa aneh. Sualna eta ahli terapi polarisasi anu sok jadi instruktur senam yoga teh geus biasa ngalaksanakeun jurus-jurus anu aya dina SPI.

“Tiap gerakan dina SPI aya oge dina senam yoga,” cek Steve. Ngadenge kitu, Gyan katempo mani curinghak. “Ku margi kitu abdi resep kana SPI. Ka sing saha bae anu tos nyobian SPI, teraskeun senamna sacara konsisten, ulah dugi ka liren, margi karaos ku abdi, tiap gerakan dina SPI sae paedahna,” Steve ngayakinkeun.

Ku sabab masih bagean tina senam yoga, Steve wakca ka Gyan, kumaha lamun SPI teh dihartikeun senam yoga Islami? Gyan anggur ngabelengeh seuri ngadenge omongan Steve kitu teh.

Basa hal eta dibejakeun ka sababaraha aktivis SPI, loba anu panuju kana pamadegan Steve. “Nya merenah we SPI disebat senam yoga Islami oge, margi gerakan-gerakan dina SPI mah apan hasil tina eksplorasi sareng optimalisasi tehnik gerakan solat,” cek Ibu Djamilah (71) anu saban poe Salasa jeung Jumaah sok miluan SPI di Banjaran Kabupaten Bandung. [] Endang GG