Ulah Nyiduh di Mana Wae!

Pangwawadi ti pangurus Istora Senayan Jakarta.

Basa tatangga kuring rek hajat ngawinkeun anakna, jul-jol ti mana mendi dulur katut babaturanana. Ku sabab heurin di jero imahna, atuh sawareh mah ngariung di luar. Puguh resep saenyana mah upama riung mungpulung sadulur-dulur atawa sabatur-batur teh. Kuring oge milu bungah nempona. Ngan hanjakal, aya nu matak teu pikaresepeun basa kuring ngareret ka luar imah teh, nya eta di antarana aya lalaki tengah tuwuh anu kecrot-kecrot nyiduh di sisi jalan. Nyiduhna teh bangun taya kaisin, da hareupeun batur-baturna.

Anehna taya saurang-urang acan anu ngahuit kana eta tingkah anu teu hade teh. Duka teu wanieun, duka pedah dianggap teu masalah nyiduh di mana wae teh. Kaasup kuring oge teu wani mentog. Dina hate kuring bati mentegegna bae. Hayang nyaram, malah mun kongang mah nyarekan, tapi teu wasa.

Paingan atuh aya urang bule ti Amerika anu netelakeun yen urang Indonesia mah jorok, sok nyiduh di mana wae. Kuring ngarasa teu genah ngadenge pokpokanana eta urang bule teh. Tapi, ari kabuktianana enya kitu mah kuring oge teu bisa majar kumaha. Leuwih yakin deui kana handapna tingkat kasadaran bangsa urang kana kaberesihan teh nya eta basa kuring ngalanto ka Istora Senayan Jakarta. Di dinya katempo luhureun jukut aya tulisan ngajeblag anu eusina ngalarang nyiduh di mana wae, sabab cenah nyiduh di mana wae teh bahaya pikeun kasehatan balarea.

Anu bener mah, saur A.M. Isran, BSC, MBA, Ph.D, saban rek nyiduh teh kawas rek kahampangan, nya eta milampahna di jamban. “Memang saenyana mah ciduh ulah nepi ka diteureuy. Komo ciduh anu rasana pait mah. Eta teu hade pikeun kasehatan lamun nepi ka diteureuy deui teh,” saur eta great master pijat getar syaraf. “Ciduh meunang diteureuy lamun rasana amis atawa tawar,” saurna deui basa pareng ngawangkong jeung kopean.com di bumina, perumahan Guruminda Bandung. [] Endang GG