Aku jeung Saya

Urang Sunda make basa Indonesia? Atuh nya keun bae, da apan urang Sunda oge urang Indonesia.  Urang Sunda cacarita ku basa Inggris, basa Arab, atawa basa deungeun sejenna oge pek wae ari bisa mah. Nu penting merenah numutkeun waktu jeung tempatna. Da mun teu merenah mah moal genah karasana. Biasana hal anu teu merenah kajadian lamun nu milampahna teu ngarti kana naon anu dipilampahna. Teu hese manggihan jalma model kitu teh. Kawas lebah ngalarapkeun kecap ‘aku’. Apan kiwari mah remen ngadenge omongan bangsa urang anu nga-‘aku’-keun teh. “Aku mah pengen beli rumah dan mobil mewah,” kitu salasaurang mojang anu sapopoena tihothat jadi tukang bisnis.

“Aku mah pengen beli mobil-mobilan aja ah,” omong budak taman kanak-kanak basa ngawangkong jeung babaturanana.

Nu nga-‘aku’-keun teh lain kolot bae. Anak-anakna oge narurutan pa-aku-aku ari keur ngawangkong jeung sasama teh.

Saliwat memang teu karasa masalahna. Tapi lamun dilenyepan, diudag ku rasana basa, kecap‘aku teh ngandung harti umaing. “Babandinganana lamun dina basa Sunda mah kecap aku teh sami sareng aing. Benten sareng saya. Ari kecap saya mah sami sareng abdi,” saur Mang Nanang basa pareng ngawangkong sareng kopean.com di bumina, Kampung Peundeuy Cicalengka Kabupaten Bandung sawatara waktu katukang.

Malah kungsi dina hiji kasempetan, basa kuring ngawangkong di bumina, Jalan Imam Bonjol Bandung, Prof. dr. H. Soedjatmo Soemowerdojo (almarhum) ngajelaskeun yen anu pantes nga-‘aku’-keun mah Gusti Nu Mahasuci, Pangeran Nu Maha Kawasa. Sabab, saur H. Soedjatmo, kecap aku lamun dirarangkenan jadi keakuan anu ngandung harti ego sentris. Jebulna tina keakuan nya eta ngaku-ngaku naon bae anu aya dina dirina jadi milikku, istriku, suamiku, anakku, rumahku, mobilku, jerih-payahku, jeung saterusna ti eta. Padahal, manusa mah teu bisa ngaboga-boga. Anu pantes nga-aku-keun mah mung Alloh Nu Murbeng Alam.

Pantesna, saur eta mantan Dekan Fakultas Kedokteran UNPAD, pantesna pikeun manusa mah nga-saya-keun. Angot ngarumasakeun diri jadi hamba Alloh mah. Sabab, kecap saya mah tina kecap sahaya. Ari sahaya teh apan hamba, abdina Gusti Nu Mahasuci. [] Endang GG