Cara Nyampurnakeun Hayam

sundaonline.com

Kuring boga kolot kapernah paman, nu harita jeuneng naib di hiji kacamatan Kabupaten Bandung. Ari kasedepna pisan kana daging hayam. Sabalikna ari nu kapernah alona mah (kuring) teu beukieun kana daging hayam. Ari hayam mah loba piaraan, nu gede nu leutik oge aya harita, tapi tara dipeuncitan, da ngan ukur resep wungkul bari jeung nyaah ka sasatoan.

Dina hiji poe paman teh datang nganjang ka imah. Kasampak hayam-hayam teh keur ngalencar di buruan. Paman teh ningalian bari kawas nu nyidik-nyidik neangan piliheun, da kajudi mencrongna teh kana hayam babon nu panglintuhna.

“Jang, alus ieuh hayam teh,” saurna bari nunjuk ka nu dimaksud. “Hilian bae ku Emang, engke dianteurkeun ka dieu, mun Emang pareng ka dieu deui.”

Teu dihaminan ku kuring: “Ah, entong Mang, sawios masihan artosna we galeuhkeuneun, upami Emang palay hayam mah, da tangttos kana dipeuncitna teh ku Emang. Ka nu abdi mah ulah, Mang, karunya....”

Can kungsi tamat omongan kuring, geus dipegat manten: “Karunya mah lain kitu! Saenyana hayam teh hayang sampurna, tapi teu bisaeun. Bisana sampurna, kudu disampurnakeun ku urang, manusa.” Kitu kasauran paman teh, tandes deuih ngomongna kitu teh.

“Kumaha Mang carana?” tanya kuring hayang nyaho.

Jawabna tandes: “Dipeuncit, didahar ku urang. Tah sukaeun dikitukeun teh hayam mah.”

“Karunya atuh Mang,” cek kuring. “Hayam dipeuncit mah nyerieun, buktina gugurubugan jeung teterejelan hayangeun leupas tina panyekel nu rek meuncit.”

Paman teh ngadelek ka kuring: “Ih ari Ujang, pangna gugurubgan teh atoheun,” omongna bari metakeun dua leungeun dikiplik-kiplik cara ilaharna jelema meunang kabungahan. [] S. Sauni