Cicilan

Di Tatar Sunda loba ngaran tempat anu diawalan ku kecap Ci, kawas Cibeureum, Cimindi, Cimahi, Ciater, Ciawitali, Cikahuripan, Citamiang, Ciliwung, Citarum, Citaliktik, Cimande, Cibeber, Cianjur, Ciamis, Cikambuy, Cijambe, Cidadap, Ciparay, Cicalengka, Cikancung, Ciburuy, Ciranjang, jeung rea-rea deui.

Naha bet diawitan ku Ci ngaran-ngaran eta tempat teh? Teu aneh, sabab, sacara sintaksis jeung etimologis, dina basa Kawi mah Sunda teh ngandung harti cai. Ari cai apan lambang subur ma’mur, mere pangrojong kana kahirupan sugrining mahluk. Tukuh maksud. Tara boboleh enggoning ngudag tujuan. Nyaho pamiangan sareng nyaho pangbalikan (siklus: laut – saab – mega – hujan – walungan – laut). Ku kituna pantes karuhun baheula maparin ngaran patempatan teh diawalan ku Ci. Tumali jeung eta teu merenah seug nyebut Sunda tapi bororaah ngarojong kana kamaslahatan manusa, malah sawangsulna matak mugurkeun batur. Teu ceehan, boboleh sieun ku eleh, hirupna linglung teu terang ti mana nya pamiangan ka mana nya pimulangeun.

Ayeuna di Tatar Sunda beuki loba jalma anu liwung jeung linglung. Lain ku sabab Tatar Sunda geus leungiteun Ci. Masalahna, Ci geus dikantetkeun jeung paripolah jalma anu moho kana dunya barana bari ngahalalkeun sagala cara. Di Cibeureum, di Cimindi, di Cimahi, di Ciburuy, di Ciranjang, di Cianjur, di Citarum, di Ciamis di Ci-Ci sejenna rea jalma anu liwung ku CICILAN. Cicilan imah, Cicilan motor, Cicilan mobil, Cicilan parabot rumah tangga, Cicilan hutang, jeung sajabana, anu brasna mawa jalma kana jadi CIPEUW jeung CILEUPEUNG. [] Endang GG