DVD Lagu Sunda Tetep Marema

Tio keur ngaladangan nu mareuli DVD lagu-lagu Sunda. | sundaonline.com

Cek saha urang Sunda geus teu nyaah ka Ki Sunda? Lamun enya mah kitu, atuh lagu-lagu Sunda moal payu. Lamun lagu-lagu Sunda teu payu? “Nya abdi rugel atuh,” cek Tio, padagang DVD di Jalan Astanaanyar Bandung, deukeut terminal Tegallega.

Tio netelakeun ka sundaonline.com, alhamdulillah tug ka wangkid ieu tetep loba konsumen anu meuli DVD lagu-lagu Sunda. Malah mun diitung-itung mah, panglobana nu payu dina daganganana teh DVD lagu-lagu Sunda. Da jeung enyana, eta omongan Tio lain akon-akon. Basa kopean.com ngalongok ka jongkona, aya sawatara konsumen anu meuli DVD lagu-lagu Sunda. Malah aya ibu-ibu anu barang jol langsung nyeuleungkeung nanyakeun Karedok Leunca ka tukang DVD teh. Atuh eta ibu-ibu teh pada ngageuhgeuykeun ku nu araya di dinya. “Meser karedok leunca mah di tukang karedok atuh, Bu,” omong nu araya di dinya. Atuh barakatak si ibu-ibu teh seuseurian.

Ngadenge pananya ti eta ibu-ibu sarupa kitu teh Tio giak mangnyokotkeun DVD-na. “Tah, Karedok Leunca mah,” pokna bari tuluy ngasongkeun eta DVD ka ibu-ibu anu nanyakeunana.

“Sok atuh cobian setel heula laguna,” ibu-ibu ngurihit deui ka Tio. Teu kaleked, Tio nurutkeun pamenta eta si ibu.

Tetela, cek ukuran jaman ayeuna mah, eta lagu Karedok Leunca teh genaheun kadengena. Meujeuhna eta lagu rek dipikaresep ku barudak ngora oge. Atuh da laguna cocok pikeun nu resep joged mah. Keun bae sanajan teu kaasup kana lagu Sunda klasik oge. Nu penting mah laguna nyunda, make basa Sunda, kahartieun keneh ku urang Sunda. [] Endang GG