Endog Asin Undak Hargana

Pa Momon.| sundaonline.com

Basa endog asinna dibeulian ku palangganna di Blok C5 Sanggar Indah Banjaran Kabupaten Bandung, Pa Momon (68) lain atoh. Ieu urang Kamasan Banjaran Kabupaten Bandung teh ngadon ngarahuh jeung humandeuar. Naha? “Atuh da ayeuna mah batina saalit,” eta akina tujuh incu teh ngajentrekeun ka sundaonline.com, Salasa (28/10). Naha bet jadi saalit batina? “Sumuhun da ti dituna undak pangaos endog asin teh,” saurna deui. Naha pami undak ti dituna bet jadi saalit batina?

“Atuh da Emang teu werat ari kedah naekkeun pangaosna ka palanggan mah,” Pa Momon anu tos buyutan hiji teh ngeceskeun bari rada keom.

Aya dua rupa harga endog asin anu dijualna. Anu leutik Rp 2.500,00 sabutirna, anu rada gede mah Rp 3.000,00. Geus kaitung lila Pa Momon ngajual endog asin ku harga sakitu teh. Ngan harita mah lumayan batina. Tina sabutir endog asin teh bisa boga bati Rp 500,00. Ari ayeuna mah batina ukur Rp 300,00 tina sabutirna endog asin teh. Sababna mah apan ti dituna undak hargana jadi Rp 2.200,00 per butir pikeun anu ukuranna leutik, Rp 2.700,00 pikeun anu ukuranna rada gede.

Ku undakna harga, Pa Momon jadi teu bisa ngasupkeun endog asin ka warung-warung. Sabab si tukang warung teu kabitaeun ku bati Rp 300,00 per butir anu kudu dibagi dua: pikeun Pa Momon Rp 150,00, pikeun nu ngawarung Rp 150,00.

Waktu hargana can naek mah, Pa Momon bisa ngajual leuwih ti 200 butir endog asin saban poena. Ari ayeuna ukur 100-140 butir endog asinna anu kajual saban poena. Kitu oge lamun Pa Momon daek ngiderna. Lamun teu daek ngider mah, nya teu boga untung pisan. Ketang lain gumantung kana daek teu daekna, tapi gumantung kana jagjag henteuna awak. “Da apan Emang mah boga panyakit jantung,” eta bapa ti lima anak teh nembrakkeun kaayaan dirina.

Samemehna ngider dagang endog asin, Pa Momon teh pakasabanana kana ngabordel jeung ngaput pakean. Ku sabab taun 2005 katarajang panyakit jantung, Pa Momon teu bisa nuluykeun eta pakasabanana. Ongkoh deui ku lima anak-anakna dihulag sina istirahat bae. Ma’lum geus tuman digawe, salila istirahat teh karasana kaluman. Pikeun ngabangbrangkeunana, ieu urang Tasik anu meunangkeun istri urang Naripan Bandung teh unggal poe jadi resep jalan-jalan, utamana unggal isuk-isuk. “Ah, jalan-jalanna oge alon, da ti saprak katarajang panyakit jantung mah teu tiasa gancang mapah teh. Upami mapah gancang teh osok sesek,” saurna.

Naha atuh ari kitu mah bet maksakeun ngider dagang endog asin? Apan ku barudak oge sina istirahat? Nya eta teu kahaja cenah. Dina hiji poe, taun 2006, waktu Pa Momon keur jalan-jalan di Kamasan Banjaran Kabupaten Bandung, paamprok jeung nu sok nyieunan endog asin. Eta tukang endog asin teh ujug-ujug nyeuleungkeung kieu: “Mending oge jalan-jalan teh bari ngajingjing ieu.”

Teu panjang pikir, Pa Momon ngaenyakeun. Harita langsung bae Pa Momon ngider bari ngajingjing 50 butir endog asin anu diwadahan kana wadah kawat jeung wadah palastik. Tetela eta endog asin anu diiderkeunana teh sakeak. Puguh we Pa Momon sugema. Cek pikirna, naon salahna bari leumpang jalan-jalan ngahasilkeun duit. Ongkoh deui piraku rek ngahesekeun wae ka nu jadi anak mah, da apan anak-anakna oge geus boga uruseun sewang-sewangan. Sanggeus bisa ngajual 50 butir mah, Pa Momon menta ka nu  nyieunan endog asin sangkan diagehan 100 butir endog asin saban poena. Tina 100, menta deui jadi 200 butir, tug ka wangkid ieu Pa Momon ngajual endog asin 100-200 butir saban poena. Pikeun bisa ngajual 100-200 butir endog asin teh Pa Momon kudu ngider ti Kamasan Banjaran nepi ka Sanggar Indah Banjaran. “Tapi ti Kamasan dugi ka Ciluncat mah Emang tumpak angkot,” saurna. “Ti Ciluncat dugi ka Sanggar, Emang nikreuh bari ngajingjing endog asin,” saurna deui. Waktuna mulang oge sarua. Ti Sanggar Indah Banjaran ka Ciluncat nikreuh, ti Ciluncat ka Kamasan tumpak angkot. Bedana, waktuna mulang mah Pa Momon ngajingjing wadah kosong, da endog asinna geus kajual kabeh. Teu lila ngiderkeunana teh, ti tabuh tujuh isuk-isuk nepi ka lohor.

Ari geus beres ngawangkong mah, Pa Momon anu tadina ngarahuh teh jadi ngabelengeh seuri. Enya meureun salila ieu taya batur pikeun curhat nu matak Pa Momon sok ngarahuh jeung humandeuar teh. [] Endang GG