Heri Naswari, Juru Sekar Pangalusna Sa-Kota Bandung

Heri Naswari

Geus ngulik ti leuleutik, geus nalaktak ti bubudak. Enya, Heri Naswari (35 taun) wastana, anu cik keneh jadi kareueus balarea ku lantaran ieu  nonoman asli ti Majalaya Kabupaten Bandung teh kapeto jadi Juru Sekar Terbaik sa-Kota Bandung.  “Alhamdulillah, abdi bungah amarwatasuta tiasa kapeto janten juru sekar terbaik sa-Kota Bandung. Padahal basa ngiringan pasanggiri teh sora abdi keur peuyeuh,” cek Heri basa ngawangkong jeung sundaonline.com satutasna rengse Pasanggiri Calung Ka-1 sa-Kota Bandung anu dilaksanakeun tanggal 29-30 September 2014 di Padepokan Seni Mayang Sunda Jalan Peta 209 Bandung.

Kiwari, geus lain akon-akon jadina seniman Sunda teh, sabab balarea nu geus netepkeunana. Ku kituna, kayakinan Heri jadi seniman Sunda beuki panceg. Tekadna pikeun ngamumule seni Sunda beuki buleud. Insya Alloh, cek Heri, seni Sunda moal nepi ka tumpur, sabab di tengah-tengah gangasna ieu jaman masih aya urang Sunda saentraganana anu mirosea kana budaya Sunda. Ciri nyaah ka Ki Sunda geus dibuktikeun ku Heri dina kahirupanana anu teu bisa leupas tina cara hirupna anu nyunda. Baju pangsi warna hideung, kaen iket anu meulit sirahna anu gondrong, basa Sunda anu murwakanti, sorana anu halimpuh, sikepna anu teu weleh rengkuh ka nu janten sepuh, tug ka aubna kana pasanggiri seni Sunda, geus jadi ciciren nyaahna Heri ka Ki Sunda. “Abdi mah reueus janten urang Sunda teh,” cek Heri anu kungsi kuliah di jurusan karawitan Sekolah Tinggi Seni Indonesia (STSI) Bandung.   

Loba nu tibelat lamun ngadenge Heri keur nyuling atawa ngahaleuang. Basa jaman kuliah, Heri sok remen ulin di imah sobatna, Firman Setianugraha. Lamun geus paamprok, eta dua sobat teh geus pasti rame. Heri ngahaleuang jeung nyuling, Firman bagean kacapina. Puguh bae balarea anu ngadengena ngarasa reueus. Tepi ka, basa aya acara Pemilihan Calon Ketua RW 06 di Sanggar Indah Banjaran Kabupaten Bandung, Heri jeung Firman dipentes pikeun kaul.

Ayeuna, salaku seniman Sunda, jadwal manggung Heri kawilang kerep. Angot ayeuna sabada Heri kapeto jadi Juru Sekar Terbaik. Sanajan kitu, Heri masih ngemu hiji udagan, nya eta hayang asup ka dapur rekaman, hayang medalkeun albeum lagu Sunda. Pikeun ngawujudkeun hal eta, Heri geus nyieun kontak jeung sababaraha pihak, salahsahijina nya eta jeung Rakhmat Margajaya alias Endang GG anu resep ngarang lagu-lagu Sunda, oge Firman Setianugraha sobat kuliahna tea. “Ayeuna abdi, Firman, sareng Kang Endang GG nuju nyiapkeun lagu-lagu Sunda anu temana religi, cinta, jeung lingkungan hidup. Panuhun ka sadayana jiad pangdungana malar ieu udagan janten kanyataan,” pokna bari tuluy nganuhunkeun ka Dinas Kebudayaan dan Pariwisata Kota Bandung jeung Paguyuban Seni Calung Kota Bandung (PSCKB) anu geus sukses gawe bareng ngalaksanakeun Pasanggiri Calung Ka-1 sa-Kota Bandung. [] Endang GG