Hiji Siswa Hiji Laptop

Drajat

Dikaitkeun jeung KBM (Kegiatan Belajar Mengajar) mah kalah ka ngabarubahkeun internet teh. Babakuna pikeun barudak sakola di padesaan. Tong jauh-jauh, di Desa Nagrak Kacamatan Cangkuang Kabupaten Bandung oge loba keneh barudak sakola anu sok ngangluh ku lantaran dibere tugas ku guruna pikeun neangan informasi di internet. Ari ngangluhna dumeh lalampahan ti imahna eta barudak ka tempat internet (warnet) kaitung jauh. Ku jauhna, eta barudak jadi kudu tumpak ojeg, tuluy mayar warnet, jeung nge-print informasi anu ditugaskeun ku guruna tea. “Padahal salasahiji tujuan ku ayana eta tugas teh supaya ekonomis,” saur Pa Drajat, S.Pd., M.M.Pd., basa ngawangkong jeung sundaonline.com.

Naha nyiar info di internet disebut ngarah ekonomis? Sabab lamun barudak sina meuli buku pelajaran kawas baheula mah bakal “didemo”, boh ku masarakat boh ku pamarentah anu geus teu ngawenangkeun sakola jadi distributor buku. “Jaman sakola tiasa keneh ‘ngical’ buku ka barudak, apan ku masarakat dianggapna memberatkan orangtua murid. Ku kituna pamarentah ngalarang pendistribusian buku cara harita,” Pa Drajat anu sadidintenna sibuk ngawulang matematika di SMP Negeri 1 Cangkuang Kabupaten Bandung teh ngajentrekeun.

Saenyana, ku usumna marake smartphone, info di internet bisa ditempo ngaliwatan smartphone. Ku kituna barudak teu kudu indit ka warnet. Tapi ieu ideu teu bisa laju, sabab pihak sakola umumna ngalarang make hape ka murid-muridna. “Situasi model kieu nyandak gejed kana KBM di sakola,” saur Pa Drajat.

Ku kituna, Pa Drajat miharep, nu jadi guru kudu gede tinimbangan. Ari mere tugas teh kudu luyu jeung kaayaan barudak. Tapi, Pa Drajat nuluykeun, ku sabab ayeuna geus jamanna internet, nya eta era informasi tea, hadena mah pihak sakola ngayakeun program kepemilikan laptop (notebook atawa netbook) anu teknis pelaksanaanana bisa sacara cash atawa credit. “Pokona mah hiji siswa hiji laptop,” saur Pa Drajat daria. “Teu nanaon dicicil salami tilu taun ajaran oge, nu penting tiap siswa gaduh laptop. Lamun tos aya laptop-na mah pihak sakola we ngayakeun hotspot,” saurna deui.

Ku cara kitu, Pa Drajat yakin, tugas ti guru ka murid pikeun nyiar info di internet teh moal ngabarubahkeun. Nu penting, dijelaskeun ka barudak jeung kolot-kolotna ngeunaan maksud jeung tujuanana ngayakan program kepemilikan laptop. [] Endang GG