Ku Mr. Bill 'Matematika Bikin Ketawa'

Drajat alias Mr. Bill.

Wasta aslina mah Drajat. Ku sabab kuliahna cacap nepi ka S2, nya wastana anu ngan sakecap teh diwuwuhan ku S. Pd jeung M.M.Pd. Jadi we Drajat, S. Pd., M.M.Pd. Eta wasta anu diwuwuhan ku gelar akademik teh jadi populer di lingkungan kadinesanana, di SMP Negeri 1 Cangkuang Kabupaten Bandung. Tapi, eta guru matematika jebolan Universitasi Pendidikan Indonesia (UPI) Bandung teh ku murid-muridna mah dilandihna Mr. Bil. Mr teh kancahan tina mister, ari Bil kancahan tina bilangan. Jadi, sacara harpiahna mah Mr. Bil teh Tuan Bilangan, minangka sinonimna tina ahli matematika.

Meujeuhna disebut kitu teh, da Pa Drajat mah memang ahlina matematika. Buku-buku matematika anu ditulisna oge geus kaitung loba, dipedalkeunana ku penerbit anu kakoncara deuih kalayan asup kana itungan buku best seller. Lian ti kitu, Pa Drajat oge remen kapeto jadi juara penulisan buku tingkat nasional.

Tapi aya nu matak nguatkeun dirina salaku Mr. Bil, nya eta Rumah Bilangan anu diadegkeunana. Rumah Bilangan teh mangrupa tempat bimbingan belajar (bimbel), ngan husus matematika. Di Rumah Bilangan, Pa Drajat make metoda CERDAS, nya eta kancahan tina CERita DAn Simulasi. Ku cara anu CERDAS, barudak anu diajar di Rumah Bilangan jadi resep kana matematika. Malah ku Mr. Bil mah Matematika Bikin Ketawa kawas dina salasahiji judul bukuna.

Kagiatan di Rumah Bilangan. 

Geus aya kana lima taunna Rumah Bilangan ngadeg di Sanggar Indah Banjaran C5 No. 21-23 Kabupaten Bandung. Pesertana geus aya kana 400 siswa anu ngawengku barudak SD, SMP, jeung SMA. “Alhamdulillah, barudak anu bermasalah dengan pelajaran matematika, sabada diajar di Rumah Bilangan mah janten resep kana diajar matematika,” saur Pa Drajat anu kungsi nulis rebuan artikel dina sababaraha media massa nasional.

Sanajan kitu, Pa Drajat teu komersial. Ieu mantan Kepala SMP Salman Al-Farisi Bandung teh malah boga udagan hayang ngalatih nonoman ngarah maranehna bisa ngajarkeun matematika ka barudak anu bermasalah dengan pelajaran matematika tea. Kaderisasi jeung duplikasi dina metoda CERDAS, insya Alloh baris mere pencitraan anu hade kana matematika anu salila ieu remen dipikaceuceub ku barudak.

Pa Drajat oge ngaladenan sing saha bae anu hayang diajar matematika sacara jarak jauh, nya eta sacara online ngaliwatan e-book matematika di www.rumahbilangan.com. “Alhamdulillah, respons ti balarea kana rumahbilangan.com kawilang sae,” Mr. Bil ngabelengeh seuri. 

Pikeun nu palay apal kana portopoliona Pa Drajat, mangga urang wincik bae nya. Pa Drajat kantos kapeto jadi Juara I Kepenulisan Pariwisata Jawa Barat 1992, Juara II Menulis Esai Jawa Bali, Juara II Menulis Perpustakaan Jawa Barat, Juara II Menulis Cerita Anak Tingkat Nasional, Penulis Terbaik Nasional Matematika SD 2003 Pusbuk, Penulis Terbaik Matematika SMP BNSP 2005, Penulis Buku Fisika BNSP 2007, Juara I Buku Pengayaan Matematika SD BNSP 2008.

Buku-bukuna Pa Drajat anu parantos medal nya eta Aku Suka Matematika Kelas 1-6 (Grafindo), Belajar Mudah Matematika Kelas VII-IX (Nimas Multima), Ilmu Pengetahuan Alam Terpadu Kelas VII-IX (Regina), Fisika Untuk SMA Kelas X-XII (Inprasa), Bersahabat dengan Matematika (Rosdakarya), Matematika yang Menakjubkan, Komik Anak Sekolah (DAR Mizan), Matematika Bikin Ketawa (Dar Mizan), Menghitung Vampir (Dar Mizan), Bakso Ajaib (Dar Mizan), Cara Praktis Jago Matematika (Dar Mizan), Komik Bikin Pinter, Matematika Punya Cerita (Dar Mizan), SuperMath Seri 1-6 (Tinta Emas), Bunyi (Grafindo), Cahaya (Grafindo), Cuaca (Grafindo), Gelombang (Grafindo), Magnet dan Listrik (Grafindo), Suhu dan Kalor (Grafindo), Zat dan Sifatnya (Grafindo), Penemu dan Temuannya (Grafindo).

Profesi nu kantos kasorang ku Pa Drajat nya eta Guru SD Salman Al-Farisi Bandung, Guru SMP Salman Al-Farisi Bandung, Kepala SMP Salman Al-Farisi Bandung, Aktivis di Sekolah Alam Bandung, Aktivis di Sekolah Internal Al-Kautsar Sukabumi, Penggagas Little Farmer Bandung, Kepala SD Islam Plus Ummul Mukminin, Konsultan Pendidikan Tumbuh Kembang, Editor Buku Grafindo, Wartawan Freelance, Ghost Writer, Guru SMP Negeri 1 Arjasari Kabupaten Bandung, Koordinator Perpustakaan Kubu Kutu Buku, Pengasuh Galeri Matematika.

Ayeuna mah fokus kagiatan Pa Drajat teh jadi Guru SMP Negeri 1 Cangkuang Kabupaten Bandung, jadi penulis/pangarang, jadi pembicara/trainer, jadi pebisnis online, jeung owner Rumah Bilangan. [] Endang GG