Kumbah Leungeun Make Sabun

Ngumbah leungeun make sabun.

Saban tanggal 15 Oktober teh  balarea sadunya mieling Hari Cuci Tangan Pakai Sabun. Ayana eta poe teh minangka pangwawadi sangkan urang sadayana henteu hilap ngangge sabun saban kukumbah panangan. Atuh da panangan teh sok nyabak sagala rupa. Boh nyabak anu beresih boh nyabak anu kotor. Lebah nyabak anu kotorna apan bahaya lamun panangan langsung ngahuapkeun kadaharan kana baham urang teh. Mangkaning, cek katerangan, tina mindeng ngeukeuweuk atawa nyabak handphone wungkul oge gede mamalana  kana kasehatan urang teh, upama urang teu remen ngumbah leungeun make sabun.

Handphone bisa leuwih kotor batan kloset.

Numutkeun panalungtikan paraahli, kokotor, kuman, bakteri, atawa bibit panyakit anu napel dina handphoneurang teh bisa jadi leuwih loba batan kokotor anu napel dina kloset. Bayangkan eta kanyataan nepi ka kituna. Tetela, bibit panyakit tina handphone teh lain mangrupa radiasi bae, tapi oge aya nu mangrupa baketri jeung kuman sejenna.  Jebulna eta kuman anu napel dina handphone teh salasahijina tina kesang leungeun urang. Eta kesang teh napel kana handphone, tuluy basi kesangna nepi ka timbul proses kimia alami anu ngabalukarkeun ayana kuman.

Eta teh kakara tina handphone. Encan tina barang-barang sejenna. Encan deuih tina kagiatan samodel ngorong, ngodekkan tai ceuli, atawa ngala cileuh. Ku kituna pantes balarea sadunya sapuk ngayakeun Hari Cuci Tangan Pakai Sabun. Angot ayeuna alam dunya keur gehger ku ayana virus ebola anu geus malastrakeun belasan jalma di Amerika. Bangsa Spanyol oge nepi ka tingkoceak ku ayana virus ebola teh. Ku kituna pamarentah di tiap nagara cumeluk ka balarea sangkan ulah petot-petot beberesih, salasahijina nya eta ngumbah leungeun ku sabun. [] Endang GG