Mayar Hutang ku Endog Meri

Endog asin. | sundaonline.com

Pangna endog asin undak hargana teh ku lantaran endog merina langka. Apan kieu jujutanana teh: tukang nyieunan endog asin meuli endogna ka bandar, bandar meuli endogna ka tukang miara meri di sawah. Tukang miara merina mah teu ngendog. Hehehe.... Ngan saban meri-merina ngarendog, endog-endogna tara ngari. “Dianggo mayar sametan,” saur Pa Momon (68) anu saban dinten ngider icalan endog asin ti Kamasan Banjaran dugi ka Sanggar Indah Banjaran Kabupaten Bandung. “Abdi terang kitu teh ti urang sawah anu miara meri,” saurna deui ngayakinkeun.

Enya, Pa Momon netelakeun, rata-rata anu miara meri teh kajiret hutang. Ku sabab saban jatuh tempo teu bisa mayar, nya antukna mah endog meri jadi tandonna. Saenyana mah rugi mayar hutang ku endog meri teh, tapi da piraku hutang teu dibayar mah. Cacakan dibayar ku endog meri oge sakitu nyorongotna nu nagih hutang teh, angot lamun teu dibayar. Rupa-rupa anu nagih hutangna teh. Aya nu ti bank biasa, aya nu ti bangling alias bank kelilingalias rentenir perorangan. “Anu abot mah mayar sametan ka bangling,” saur Pa Momon bari tuluy ngusap dada, sukuran ka Alloh SWT, sabab dirina mah tara kagoda ku nganjuk ngahutang, angot ngahutangna ka bangling mah.

Duka iraha harga endog asin stabil deui. Jigana mah nungguan nepi ka nu ngarangon meri lalunas heula hutangna. Urang du’akeun, nu kajiret sametan sing enggal bebas sametanana. [] Endang GG