Naha Bet Lalajo nu Keur Digawe?

Dra. Elly Herliawaty. | sundaonline.com

Sakabeh acara dina televisi memang lalajoaneun. Tapi lain hartina urang wajib ngalalajoan sakabeh acarana. Angot nepi ka urang teu bisa minge ku lantaran moho kana lalajo acara televisi mah. Mun nepi ka kituna, hartina urang geus kajajah ku televisi. Kiwari memang teu saeutik jalma nu kajajah hirupna ku acara televisi. Angot anu geus katungkulkeun ku acara sinetron atawa gosip infotainmen mah. Rebun keneh geus nyetel televisi. Wanci carangcang tihang ngajejentul hareupeun televisi. Beurangna, bari dahar, lalajo sinetron Korea. Pasosore lalajo deui infotainmen. Wanci magrib lalajo talkshow. Wanci sholat Isya masih lalajo acara talkshow. Tuluy disambung ku lalajo serial film India. Tug ka ahirna televisi anu ngalalajoan urang, da urangna kaburu tibra hareupeun televisi anu keur midangkeun acara dunia lain.

Loba jalma anu hayang leupas tina kabiasaan goreng kawas kitu. Ibarat jalma anu hayang eureun tina kabiasaan ngaroko. Pajarkeun teh hese ngecagkeunana.

Lamun enya urang cengeng hayangna eureun tina kabiasaan goreng sarupa kitu, kuatkeun niat, buleudkeun tekad. Teu kudu ngabalangkeun televisi, da televisi mah teu salah. Nu ngayakeun acarana teu salah deuih, da puguh geus profesi maranehna. Carana mancegkeun niat, nya eta ku kasadaran yen saestuna sakumna acara dina televisi teh hasil gawena kaum profesional kayaning produserna, tim kreatifna, nepi ka artis atawa host alias nu mawakeun acarana.

“Jadi, lamun urang sapopoena ukur lalajo jeung lalajo acara dina televisi, saenyana mah urang keur lalajo jalma anu keur digarawe dina televisi,” cek Dra. Elly Herliawaty, Founder Leader Committee (FLC) Nasional PT. Melia Sehat Sejahtera (MSS) dina acara konsolidasi Member jeung Leader MSS di Kantor Stokis MSS, Pinus Regency, Jalan Soekarno Hatta Bandung, Kemis, 2 Oktober 2014. “Lamun urang resep kana lalajo televisi, kuduna urang daek nyonto kana etos gawena insan-insan televisi,” pokna deui kayalan daria.

Nu kasebut artis, selebritis, host, presenter, jeung sajabana, mibanda etos gawe anu gede tur hade. Aya kalana meh di unggal wanci maranehna tampil dina televisi. Hartina meh di unggal wanci maranehna digawe. “Tah, karakter samodel kitu anu kudu diturutan ku urang mah,” cek Ibu Elly. “Hayang sukses tapi gawena saukur lalajo nu keur digarawe mah, nya sarua jeung hayang pinter ngojay tapi ketakna saukur ngajejentul sisi balong,” pokna deui. [] Endang GG