Naha Enya E-KTP Tong Remen Dipotokopi?

Ibu Een (calik di handap), Bapa Atit, sareng Ibu Umayah. | sundaonline.com

Ibu Siti Umayah (46), warga Desa Nagrak Kacamatan Cangkuang Kabupaten Bandung, kakara apal yen Kartu Tanda Penduduk Elektronik (E-KTP) teu meunang remen dipotokopi. Eta ibu dua anak teh apalna basa keur motokopi di Ruko Sanggar Indah Banjaran Kabupaten Bandung. “Memang abdi nembe terang, margi ti saprak gaduh E-KTP, nembe ayeuna abdi motokopi,” pokna ka sundaonline.com sawatara waktu kaliwat. “Abdi terangna nya ti tukang potokopi,” pokna deui ngajentrekeun.

Basa Ibu Siti Umayah rek motokopi, ku tukang potokopi dijelaskeun yen E-KTP mah ulah remen dipotokopi. Hadena mun rek motokopi E-KTP kudu sakalian sing loba. Ka dituna, mun rek motokopi deui, nya potokopianana anu dipotokopi.

Ngadenge pangalaman Ibu Siti Umayah sarupa kitu, Ibu Een Siti Zaenab, warga Ciseah Kabupaten Bandung, jeung Bapa Atit Nursyamsi, warga Cicukang Kabupaten pada-pada curinghak, sabab aranjeunna oge kakara apal yen E-KTP ulah remen dipotokopi. “Abdi mah nembe terang, da kapungkur waktos ngadamel E-KTP teu kenging katerangan sapertos kitu,” saur Bapa Atit anu sapopoena sibuk di Balai Pusat Statistik (BPS) Jalan Surapati Bandung.

Tetela, lain Ibu Siti, Ibu Een, jeung Bapa Atit bae anu kakara apaleun sual motokopi E-KTP teh. Masih loba warga sejenna anu kakara apal kana perkara ieu. Alesanana, sarua, basa nyieun E-KTP taya anu ngajelaskeun perkara eta. [] Endang GG