Nangtukeun ‘E’ jeung ‘Eu’ Masih Pabeulit

Heri Naswari nembongkeun piagemna. | sundaonline.com

Sabada kapeto jadi Juru Sekar Terbaik sa-Kota Bandung dina acara Pasanggiri Calung Ka-1 sa-Kota Bandung anu dilaksanakeun tanggal 29-30 September 2014 di Padepokan Seni Mayang Sunda Jalan Peta 209 Bandung, Heri Naswari (35 taun) kalayan kebek ku kareueus jeung kabungah nembongkeun piala katut layang pangajen (piagem) ka dulur-dulur katut babaturanana, kaasup ka sundaonline.com di Sanggar Indah Banjaran Kabupaten Bandung.

“Ieu, A, piala sareng piagam-na,” cek Heri sabada ngaluarkeun piala jeung piagem tina ranselna ka sundaonline.com.

Enya bae eta nonoman asal Majalaya Kabupaten Bandung teh geus kapeto jadi seniman Sunda. Puguh bae sarerea milu reueus, bungah, jeung reugreug ku ayana nonoman Sunda anu mirosea ka Ki Sunda, tur daek renggenek milu ngamumule budaya Sunda.

Ngan hanjakal, dina eta layang pangajen teh aya kakurang, nya eta aya kecap anu kurang merenah ditulisna. Geura pok baca kalayan gemet, “.... Mugia ieu layang pangajen janteun pangjurung ludeung pikeun nanjeurkeun Budaya Sunda.”

Kecap anu kurang merenah dina eta kalimah nya eta kecap ‘janteun’. Ari kuduna mah apan ditulisna teh ‘janten’. 

Tapi keun bae, da masih lumrah kasalahan model kitu teh. Ulah soteh dikukut kasalahanana.

Ku ayana alpukah Dinas Kebudayaan dan Pariwisata Kota Bandung anu gawe bareng jeung Paguyuban Seni Calung Kota Bandung (PSCKB) pikeun ngayakeun eta pasanggiri oge geus mangpirang-pirang pikareueuseunana pikeun Ki Sunda mah. Ayana pasanggiri calung teh apan cirining nyaah kana seni Sunda. Sanes kitu? [] Endang GG