Nyikat Huntu Tong Make Odol

Kuring keur disikat kawat.

Geus mangtaun-taun lilana kuring ngarandapan kasakit huntu jeung sariawan. Diubar mah diubar numutkeun resep dokter, tapi hasilna nihil: eureun jadi bae kasakit teh. Tepi ka dina hiji waktu kuring ku dokter di Puskesmas dibere rujukan ka rumah sakit gede pikeun operasi huntu, sabab careham kuring, tunggulna, geus kabulen ku gugusi.

Untungna, samemeh ka rumah sakit, kuring konsultasi heula ka A.M. Isran, BSC, MBA, Ph.D, ahlina Pijat Getar Syaraf. Saur anjeunna, huntu kuring teu kudu dioperasi. “Ubar nyeri huntu jeung sariawan mah ku sikat kawat, atawa nyikat huntuna tong make odol,” saur Embah Isran.

Sikat kawat teh istilah pikeun ngaluarkeun kokotor tina sela-sela huntu (gugusi). Carana nya eta sela-sela huntu teh ditusuk-tusuk make tusuk gigi, atawa ku tungtung gagang korek kuping anu dijieunna tina beusi. Lian ti eta, nya ku nyikat huntu teu make odol tea. Nyikatna sing tarik nepi ka baloboran getih. Hadena dilaksanakeun saban isuk-isuk atawa hudang sare samemeh sarapan.

Da jeung enyana, tisaprak ngalaksanakeun eta cara, huntu kuring jadi kuat, tara nyeri deui, oge tara sariawan.

“Cara model kieu teh kapanggihna sanggeus kuring nalungtik salila opat taun,” saur Embah Isran ngajentrekeun. [] Endang GG