Proboden Angger Dilabrak

Nu ngarempak proboden ti Sanggar Indah Banjaran ka Bumi Parahyangan Kencana. 

| sundaonline.com

Jalan cagak anu mangrupa wates antara Perumahan Sanggar Indah Banjaran jeung Perumahan Bumi Parahyangan Kencana Kabupaten Bandung teh kawilang jalan anu hirup. Isuk-isuk, beurang, sore, peuting, eta jalan teh rame ku kandaraan anu lalar liwat. Sangkan nu marake kandaraan tartib di jalanna, pihak aparat masang rambu-rambu lalu-lintas.

Ti Sanggar Indah Banjaran aya tanda proboden pikeun kandaraan anu rek asup ka Bumi Parahyangan Kencana. Ku ayana eta tanda proboden, ti Sanggar Indah Banjaran mah kandaraan teu meunang make jalan beulah katuhu, tapi kudu make jalan beulah kenca. Pon nyakitu sabalikna ti arah Bumi Parahyangan Kencana ka Sanggar Indah Banjaran.

Mani jongjon eta nu ngarempak aturan. | sundaonline.com

Hanjakalna, abong adat geus kakurung ku iga, loba pengendara anu ngarempak kana eta aturan. Angger bae kalakuan umumna pengendara teh kawas samemehna eta rambu-rambu dipasang ku aparat. Teu budak teu kolot, sarua ngacona. Ngan hiji dua anu satuhu kana aturan mah.

Lamun tuluy-tuluyan kitu, alias angger wae ngaco atawa badeg alias bedegong, kawasna henteu cukup ngandelkeun rambu-rambu wungkul. Hadena kudu aya aparat (pulisi) anu turun ka jalan, ngajega di palebah eta jalan cagak. Piraku teuing ari dipoconghok ku aparat mah pengendara teh kumawani ngarempak aturan. [] Endang GG