Rea Bule nu Nyaah ka Ki Sunda

Larry Taylor sarimbit anu nyunda.| sundaonline.com

Geuning nu nyaah ka Ki Sunda teh teu kurang-kurang. Geus puguhning urang Sundana mah, dalah batur oge, anu lain urang Sunda loba nu nyaah ka Ki Sunda. Mas Agus Mubarok, urang Banyuwangi Jawa Timur anu lahirna di Bali kacida nyaahna ka Ki Sunda, tug ka ahirna kawinna oge jeung mojang urang Sunda. Aya deuih Sepnath Tupamahu, urang Ambon, kawinna jeung urang Sunda. Saking nyaahna ka Ki Sunda, Sepnath Tupamahu menta dilandih ngaranna jadi Kang Chepy. 

Lian ti eta, bule-bule anu cicing di Tatar Sunda oge tamplok kanyaahna ka Ki Sunda. Di antarana kulawarga bule ti Amerika kayaning Larry Taylor sarimbit, Dave Coles sarimbit, Frank Hairgrove sarimbit, jeung rea-rea deui.

Frank Hairgrove sarimbit nyaah ka Ki Sunda.

Salila nganjrek di Kota Bandung, eta bule-bule teh soson-soson dialajar basa Sunda. Malah kasenian tradisional oge ku maranehna diteuleuman. Ku kituna tong aneh upama di imahna Larry Taylor—anu sok dilandih Pa Surya—aya alat-alat kasenian Sunda kayaning kacapi, suling, saron, kendang, calung, angklung, jeung sajabana ti eta.

Dave Coles sarimbit nyaah ka urang Sunda.

Kungsi bareto dina hiji gempungan di Lembang Kabupaten Bandung, kuring nyaksian Ibu Peter ti Amerika ngahaleuangkeun lagu Sunda diuk simpuh ala sinden. Sorana matak dedengeeun, da puguh persis sora sinden.

Ieu kanyataan teh jadi ciciren yen saestuna anu nyaah ka Ki Sunda teh masih rea, kaasup balarea ti unggal juru nusantara jeung mancanagara. Lamun batur, deungeun-deungeun sakitu nyaahna ka Ki Sunda, atuh piraku urang anu pituin rundayanana Ki Sunda henteu kitu-kitu acan. [] Endang GG