Rea nu Ambek ku Bau Runtah

Dua minggu teu diangkut, runtah ngahunyud. Loba warga nu ambek. | sundaonline.com

Basa treuk ngurunyung rek ngangkut runtah di Sanggar Indah Banjaran Kabupaten Bandung, Kemis (23/10) teh, teu kabeh wargana ngucap sukur ka Alloh Nu Mahaagung. Aya sawatara urang warga anu kalah ka nyeuneu, ngambek bari nyorongot ka tukang runtah. “Teu baleg silaing mah, geus dua minggu runtah di dieu kakara diangkat,” kitu upama ditarjamahkeun mah kaambekna eta warga teh.

Basa diambek kitu, anu ngangkutan runtahna mah norek bae bari ngedukan runtah dina tiap wadah runtah di tiap blok. Aya eta oge anu ngawaro, nya eta basa tukang runtah ditanya ku warga anu bageur, anu sopan jeung santun. “Ka mana wae A? Tos dua minggu mani nembe ngurunyung,” tanyana eta warga anu bageur. Dibageuran mah tukang runtah oge kalayan ajrih ngawalon, “Numawi nembe ayeuna kagiliranana ngangkut runtah di dieu teh.”

Tukang angkut runtah jongjon ngedukan runtah. | sundaonline.com

Teu papanjangan eta paguneman teh, da ujung-ujungna nu purah ngangkutan runtah mah teu apal nanaon. Maranehna mah saukur dipupurah ku nu jadi atasanana.  

Saha atuh atasanana teh? Loba warga anu ngageremet, ngan teu bisa walakaya. Kaambekna eta warga disidem bae dina angen. Barina oge, cek sawatara urang warga, taya gunana sanajan kaambekna dibudalkeun oge, sabab tetela kaambek mah lain solusi pikeun ngabereskeun pasualan. Komo deui ieu mah kaasup pasualan sosial. Jadi hadena dibereskeunana ku cara musawarah kalayan hate anu tenang sarta pikiran anu jejem. []Endang GG