Soto Bandung, di Pandeglang mah Nasi Soto

Dina jero taun genep puluhan, kuring meunang tugas ti atasan (dunungan) kudu ka daerah Kabupaten Pandeglang (Banten), geusan maluruh kaayaan kabudayaan di eta daerah, pangpangna nu aya patalina jeung duit subsidi (bantuan) ti pamarentah nu dipake pikeun ngamajukeun jeung ngolah kasenian di eta daerah.

Sajeroning perjalanan, ku lantaran geus beurang tur beuteung geus karasa hayangeun dieusian, kuring duaan nyimpang ka pasar Pandeglang, neangan warung nasi, kabenera n aya nu dagang sangu jeung soto, nu ngaladanganana awewe nu geus aya umur. Kuring pesen sangu bodas, tempe jeung tahu (da kuring mah tara dahar daging), jeung pesen soto sawadah keur batur kuring.

Kabiasaan di Bandung, ari meuli soto teh cukup ku nyebut soto bae, ku nu dagang diladangan sakalian jeung sanguna geus dikuah make angeun soto tea. Tapi ari di Pandeglang mah beda deui.

Jol hareupeun kuring aya pelayan lalaki bari nunda sangu nu dipesen ku kuring tea, sangu sapiring, sababaraha keureut tempe jeung tahu disapiringkeun, jeung aya sawadah angeun soto wungkul, diteundeun dina meja hareupeun kuring jeung batur tea. Tacan buru-buru dihanca, da pikiran teh keur batur kuring tacan aya sanguna, kakara angeun soto wungkul, dagingna oge mani jeung tulang-tulangna sagede-gede peureup budak.

Kuring jeung batur kuring, nya kitu pelayan, paheneng-heneng bae. Teu lila pelayan teh ngomong: “Mangga atuh, geura dituang.”

Cek kuring: “Ieu ngantosan sanguna hiji deui kanggo ieu batur. Piraku angeun soto wungkul mah.”

“Oh, sareng sangu?” cek nu dagang teh bangun reuwas. “Da tadi mung mundut soto wungkul. Panginten teh sanes nasi soto.”

Geus kitu mah, kakara sangu teh jol sapiring, tuluy dalahar. Tina eta pangalaman jadi meunang papanggihan. Jadi soto di Bandung teh, mun di Pandeglang mah nasi soto. Ari soto di Pandeglang, mun di Bandung mah angeun soto tea, nyaaaa?! [] S. Sauni