Tong Make Perhiasan Emas jeung Perak

A.M. Isran (dikaos coklat) sareng pasen-pasenna.

Lain bisi dijambret ku jalma jahat. Make perhiasan emas jeung perak teh henteu hade kana awak, bisa ngaganggu kana kasehatan. Angot dipakena lebah ceuli kayaning anting atawa sueng mah. Temahna bisa nutup kana pori-pori awak. Lamun pori-pori nutup, sistim karinget oge bakal kaganggu, anu beh dituna nimbulkeun rupa-rupa panyakit dina awak urang.

Kitu numutkeun katerangan ti A.M. Isran, BSC, MBA, Ph.D, ka pasen-pasenna basa keur nerapi Salma (3 taun) di tempat praktekna, Perumahan Guruminda Bandung, Saptu, 20 September 2014.

Harita teh A.M. Isran keur mijit rek ngaaktipkeun tombol merinding-na Salma. Tapi sabada dipijit, angger pori-pori eta budak teh teu muriding bae. Barang dipariksa leuwih teleb, tetela, masalahna teh ku sabab Salma make anting emas dina ceulina. “Wayahna, antingna kedah dilaan,” saur A.M. Isran ka indungna Salma.  

Naha ulah make perhiasan tina emas jeung perak? Sababna mah emas jeung perak teh ngandung merkuri. Ari merkuri apan geus jadi rusiah umum, bahaya kana kasehatan. Perhiasan emas atawa perak anu keur dipake baris bahaya seug katojo ku panonpoe. Efek merkurina ngaliwatan cahaya panonpoe baris nyerep kana awak tug ngaganggu kana sistim kelistrikan dina sakujur tubuh. Geus kaganggu mah kelistrikanana nya rea rambat kamalenna. “Saenyana masalah ieu geus dijelaskeun ti jaman Archimedes, fisikawan anu kakoncara. Ngan, demi kapentingan politik ekonomi, hal ieu dikilungan.” A.M. Isran ngajentrekeun.

Atuh kumaha lamun hayang make perhiasan? Teu kiudu salempang. Gantina emas jeung perak, urang bisa make perhiasan atawa asesoris tina bahan benang jeung sabangsana. Lamun keukeuh hayang wae make emas, pek bae make emas bodas anu sok disebut platinum tea.

“Ah, platinum mah awis atuh,” cek indungna Salma.

Nya wayahna wae ari hayang sehat mah. Keur naon make nu murah oge ari jadi matak ruksak kana awak mah. [] Endang GG