Treuk Runtah Datang, Warga SIB Sukuran

Runtah ngagugunung, bauna nyambuang ka mana-mana.| sundaonline.com

Kemis, 23 Oktober 2014, warga Sanggar Indah Banjaran, hususna warga RT 04 RW 06 Desa Nagrak Kacamatan Cangkuang Kabupaten Bandung, kacida bungahna anu amarwatasuta, ku sabab dina poe eta aya pengangkutan sampah.  Rek teu atoh kumaha, da puguh pengangkutan sampah teh telatna nepi ka dua minggu. Matakna, salila dua minggu harita mah asup ka perumahan Sanggar Indah Banjaran teh bau runtah.

Karasana pisan bauna runtah mah ku paraaktivis Senam Perkasa Indonesia (SPI) anu diayakeun saban poe Salasa jeung Jumaah ti tabuh 08.00 nepi ka tabuh 09.00 di buruan bumina Pa Drajat, di Blok C5 No. 21-23 Sanggar Indah Banjaran. Rek teu karasa kumaha, da apan tiap gerakan dina SPI teh diawalan ku narik napas. Ari waktuna narik napas apan nyeuseup hawa. Pas hawana bau runtah anu nyambuang ka sakuring bungking mah nya anu diseuseupna oge bau runtah we, lain hawa seger tina udara anu beresih.

Anu keur senam kaganggu ku bau runtah. | sundaonline.com

“Kantenan waktosna gerakan anu terahir mah, duh bauna runtah teh mani kaangseu pisan,” cek Umi, Teh Win, Teh Erna, Ibu Vera, jeung Ibu Rakhmat satutasna ngalaksanakeun SPI, Salasa isuk-isuk (21/10).

Ku kituna, basa katingali aya treuk anu ngurunyung asup ka Sanggar Indah Banjaran rek ngangkut runtah teh, eta paraaktivis SPI mani raeng ngucapkeun syukur alhamdulillah ka Alloh SWT. [] Endang GG