Tukang Runtah Kudu Diajenan

Ibu N.D.Rostini dikurudung beureum.| sundaonline.com

Ningali anu ambek ka tukang runtah teh Ibu N. D. Rostini (71) mah teu satuju. Enya oge warga Sanggar Indah Banjaran nepi ka dua minggu ngalelentuk ngadagoan datangna nu rek ngakut runtah, tapi da teu kasebut sakitu mah. Malahan mah, saur eta pangsiunan Guru Agama Islam, pas pisan datangna tukang ngangkut runtah teh. Naha disebut pas? “Atuh da enya, pas keur diperelukeun da bau runtah geus nyambuang kabina-bina, pas nu rek ngangkutna datang. Jadi pas ari kitu mah,” eta ninina 13 incu teh ngabelengeh seuri.

Tukang ngangkut runtah keur ngagaya hareupeun kamera. | sundaonline.com

Saur N. D. Rostini, urang teu pantes kutuk gendeng upama pengangkutan sampah nepi ka leuirna. Tong rasa maneh geus mayar iuran ka Ketua RT atawa Ketua RW pikeun ayana pengangkutan sampah, tuluy urang sagenahna ambek-ambekan ka tukang ngangkut runtah. Urang kudu inget kana waktu mikabutuhna. Bayangkeun, seug taya pisan anu daek jadi tukang ngangkut runtah, urang rek kumaha? Rek miceunan runtah ka citarum atawa ka walungan? Atawa runtah ti imah urang rek dialung-alungkeun ka sisi jalan? Piraku nepi ka kituna peta teh. Teu nyakola kasebutna upama lampah urang nepi ka kituna.

Ayeuna mah, salaku warga anu cageur bageur, geus waktuna urang sadar pikeun bisa ngajenan ka tukang ngangkut runtah. Lamun boga rejeki, ulah sok koret ka tukang ngangkutan runtah. “Pagawean tukang ngangkutan runtah, atawa tukang meresihan runtah di jalan, eta teh pagawean anu mulya, anu pantesna mah diajenan leuwih hade batan pagawean-pagawean di kantoran anu marake dasi,” saur Ibu N.D. Rostini mani daria. “Di nagara-nagara maju mah, cek beja, tukang runtah, tukang ngagali jalan, tukang bangunan, tukang beberesih tempat umum, jeung tukang-tukang pagawean kasar lianna, dibayarna leuwih gede batan guru atawa pagawe kantor,” saurna deui.

Lamun salila ieu pamarentah can bisa ngajenan tukang ngangkutan runtah, atuh urang mah tong saruana. [] Endang GG