Bangsa Urang Pikahelokkeun

Tumpak sapedah motor bari ridu ku barang nu gagarubang. | sundaonline.com

"Urang Indonesia mah loba akalna," cek Rob, bule anu asalna ti New Zealand. Teuing ngece teuing enya muji ku eta omongan teh. Anu pasti manehna remen gogodeg ari nempo kalakuan urang Indonesia teh, utamana urang Indonesia anu aya di Bandung.

Kituna mah da enya: pikahelokkeun! Kawas anu kajadian di parapatan Jalan Mohammad Toha Bandung, Kemis, 13 Nopember 2014, Sabot lampu stopan keur beureum, katangen ku sundaonline.com aya dua lalaki tumpak motor ka arah Cimahi. Anu saurang nyupiran, anu saurang deui mah dibonceng bari nyekel sasis mobil anu gagarubang. Duka rek ka mana. Ngan anu pasti lalaki anu keur nyekel sasis mobil teh bangun geus cangkeuleun, da usad-ised bae bujurna.

Leuwih pikahelokkeunana eta anu tumpak sapedah motor bari katempo ridu teh henteu pada ngageunggeureuhkeun, jajauheun nepi ka pada nyawad atawa pada nyarekan mah. Pulisi anu aya di dinya oge teu ngahuit-huit acan. Geus dianggap biasa tea kalakuan salah model kitu teh. Padahal, tumpak sapedah motor bari ridu ku mawa barang anu gagarubang kitu teh geus puguh ngondang pibahayeun. [] Endang GG