BBM Naek, Batina Tukang Bensin Teu Milu Naek

Pa Anton miwah garwana di tempat dagangna. | sundaonline.com

Naekna harga BBM (Bahan Bakar Minyak) henteu karasa nguntungkeun pikeun tukang bensin botolan di emper jalan mah. Kawas nu kaalaman ku Pa Anton Maman Taryaman (51 taun) di Sanggar Indah Banjaran Kabupaten Bandung. Ti jaman harga bensin Rp 4.500,00 per liter, tug ka ayeuna jadi Rp 8.500,00 per liter, pikeun Pa Anton mah angger bae batina teh Rp 500,00 per liter. Jaman harga bensin di pom Rp 4.500,00, Pa Anton ngajualna Rp 5.000,00 per liter. Jaman harga bensin di pom Rp 6.500,00, Pa Anton ngajualna Rp 7.000,00 per liter. Ayeuna harga bensin di pom Rp 8.500,00, Pa Anton ngajualna Rp 9.000,00 per liter. “Nu puguh mah, tiap naekna harga BBM, abdi kedah ngamodal langkung ageung,” pokna ka sundaonline.com, Kemis, 20 Nopember 2014, di tempat dagangna.

Kungsi nyoba masang harga Rp 9.500,00 per liter dina poean kahiji naekna BBM, tapi jadi tiiseun dagangna. Ku harga sakitu mah, loba pelanggan Pa Anton anu pindah meuli bensinna ka Ciluncat jeung Tenjolaya. “Janten di dieu mah tos umumna Rp 9.000,00 per literna pangaos bensin teh,” Ibu Anton anu satia maturan Pa Anton milu mairan. Lamun harga bensin botolan di wewengkon Kacamatan Cangkuang Kabupaten Bandung leuwih ti Rp 9.000,00 per literna, konsumen milih meuli ka pom bensin anu teu pati jauh ti eta wewengkon.

Pa Anton keur ngaladenan pelangganna nu perelueun bensin. | sundaonline.com

Pa Anton balanja bensin teh ka pom bensin di Jalan Raya Soreang Banjaran Kabupaten Bandung. Bensinna diwadahan kana jarigen, dibawana kana sapedah motor. Kitu pagawean Pa Anton unggal poena. Mulang ti pom, eta bensin tina jarigen teh diparinkeun kana botol anu ukuranana saliter. Geus dibotolan mah bensin teh dipajangkeun dina rak. Alhamdulillah, geus loba anu langganan bensin ka Pa Anton. Da eta we, saban poena, Pa Anton bisa ngajual 150-200 botol bensin.

Pikeun Pa Anton mah bisana dagang bensin di Sanggar Indah Banjaran teh sasat anugrah ti Alloh Nu Maha Kawasa. Hasilna lumayan mucekil, ngagaweanana matak senang. Rek teu senang kumaha, da dina emprona dagang teh apan Pa Anton mah sok bari dibaturan ku istri jeung tilu anakna. Alhasil, barangsiarna teh teu kudu bari ninggalkeun kulawarga anu dipikacintana.

Lian ti bensin, Pa Anton oge muka loket pembayaran sacara online pikeun ngaladenan balarea nu rek mayar tagihan listrik, PDAM, jeung sajabana. Oge dagang cikopi, roko, mie rebus, gorengan, jeung jajanan lianna. Ku usaha cara kitu, alhamdulillah Pa Anton bisa nyumponan pangabutuh kulawargana. Da lamun ngandelkeun hasil tina dagang bensin wungkul mah atuh kumaha, batina teu naek-naek. [] Endang GG