Cek Tukang Lotek: Wayahna Mekel Cengek ti Bumi!

Ieu cengek kudu dibekel lamun rek meuli lotek ka Ibu Trisno. | sundaonline.com

Minggu, 23 Nopember 2014, Ibu Trisno rebun keneh geus aya di pasar kaget Bumi Parahyangan Kencana Kabupaten Bandung. Eta tukang lotek di Sanggar Indah Banjaran Kabupaten Bandung anu kajojo ku balarea teh nuju balanja lotekeun, tapi bingung. Naha? "Atuh da geuning ayeuna mah sagala arawis," pokna bari hulang-huleng di antara balarea anu pagilinggisik di pasar kaget.

Memang Ibu Trisno oge ngama'lum kana naekna harga-harga teh, da apan cik keneh harga BBM (Bahan Bakar Minyak) geus naek deui. Ngan nu matak bingung teh, Ibu Trisno teu werat lamun kudu pipilueun naekkeun harga lotekna. "Ibu mah angger we ngical lotek teh tujuh rebu rupia saporsina," saur Ibu Trisno. Harga angger teh bari eusi porsina oge teu ngurangan. "Pokona mah sagala angger we," saurna deui.

Naha atuh bet dianggerkeun kitu ari harga bahan bakuna naraek mah? Padahal mun harga lotek ditaekkeun oge moal matak didemo ku balarea, da ayeuna mah memang usumna naek hahargaan teh. "Hih, apan tacan werat pikeun naekkeunana," Ibu Trisno keukeuh kitu alesanana.

Tapi ari matak rugi mah, atuh taekkeun we harga lotek teh! "Henteu ari rugel mah, ngan memang batina janten minim," Ibu Trisno ngajentrekeun.

Eta oge aya anu dikurangan tina tiap porsi lotekna Ibu Trisno teh, nya eta cengek. Teu kitu kumaha atuh da harga cengek ayeuna leuwih ti Rp 80 rebu sakilogramna. Mangkaning anu resep lada mah, aya nu nepi ka satengah ons ku sorangan cengek teh. Coba itung, lamun satengah ons teh hartina nitih Rp 4.000,00 cengekna wungkul. Leuwih ti satengahna harga lotek Ibu Trisno. Ari rek diganti ku cengek domba, da beda karasana. Ongkoh deui, saur Ibu Trisno, ngarendos cengek domba mah teu genaheun, matak nyereng kana irung.

Lamun kitu, kumaha atuh solusina? "Nya wayahna we, ka nu raresep lada, upami ngagaleuh lotek ka Ibu mah saena bari mekel cengek ti bumina sewang-sewangan," Ibu Trisno mere kaputusan ka balarea anu geus jadi pelangganna. [] Endang GG