Contoan ku Guruna Make Sapedah

Ka sakola oge Pa Drajat resep kana sapedah. | sundaonline.com

Ngadenge razia matak serem karasana. Tapi, ari hadena ku cara kitu mah nya razia we mending oge. Tapi, lamun bisa keneh ku cara sejen anu matak genah pikeun sarerea mah hade make cara sejen bae. Maksudna? “Sumuhun, ngarah barudak anu can sawawa henteu make sapedah motor, contoan ku guru-guruna mun di sakola, oge contoan ku ibu ramana mun di bumina,” saur Pa Drajat, M.M.Pd., basa ngawangkong jeung sundaonline.comsawatara waktu ka tukang. Nyotoanana kumaha? “Nyontoanana mah ku hal anu basajan. Umpamana urang hoyong ningal barudak nu sok make sapedah motor teh ganti ku sapedah biasa, nya contoan we ku urang,” saurna deui.

Eta guru matematika di SMP Negeri 1 Cangkuang Kabupaten Bandung teh memang geus nyontoan kitu. Pa Drajat anu lulusan Universitas Pendidikan Indonesia (UPI) Bandung teh, ari ka sakola sok mindeng make sapedah. “Genah kana sapedah mah,” saurna bari seuri. Genahna apan ngaboseh sapedah mah sarua jeung olahraga, matak haneut kana awak, ngaluarkeun kesang, hartina ngaluarkeun racun (bibit panyakit) dina awak ngaliwatan kesang. Ku kituna, sistim karinget jeung sistim pembakaran dina awak urang on terus. Lamun eta sistim on terus, insya Alloh berat badan urang oge bakal normal, sabab lemak-lemak anu sipatna negatip dina awak urang bakal ka-bakar.

Ongkoh deui, jarak ti bumina ka sakolana memang kawilang deukeut. “Tapi sanes ku tebih caketna saleresna mah. Abdi tumpak sapedah ti rorompok ka sakola teh memang hoyong sehat we, katambih deui ari sapedah mah henteu nimbulkeun polusi, janten kasebatna teh ramah lingkungan tea,” saur Pa Drajat mani daria. “Intina mah kumaha niat,” saurna deui.

Pa Drajat netelakeun, ayeuna mah ulah boroning ka nu jauh, ti imah ka warung oge kolot-kolot teh make sapedah motor bari teu dihelm tea. Ku kituna, hal eta jadi conto teu hade pikeun barudak. Nya pantes we barudakna oge kabawakeun teu bener.

Matakna, lamun obyag mah kolot-kolot teh jaradi conto anu bener, insya Alloh barudakna oge kabawakeun bener laku lampahna. “Di sakola, pami guru-guruna kompak mah ngaranggo sapedah, insya Alloh siswa-siswana oge narurutan,” saur Pa Drajat bari tuluy netelakeun yen salian ti dirina aya Pa Opik, guru ti Baleendah anu sok tumpak sapedah ka sakola teh. 

Bawaning ku resep kana sapedah, saban poe Minggu Pa Drajat katut sobat-sobatna sok sasapedahan ka ciwidey, pangalengan, cililin, atawa ka tempat-tempat anu rada jauh ti bumina di Sanggar Indah Banjaran Kabupaten Bandung. [] Endang GG