Dagang Cakueh Odading Untungna Ginding

Cakueh jeung odading. | sundaonline.com

Saenyana mah loba piduiteun teh. Kari daekna, kari prakna. Da geuning ku daek mah, tukang dagang cakueh jeung odading anu nagog di sisi jalan oge bisa alus pangalana. Malah ngelehkeun pagawe kantoran. Pek we bandingkeun. Omset sapoena nepi ka Rp 1 juta. Untungna tina omset sakitu teh 30% nepi ka 40%. “Eta omset Rp 1 juta teh tina sarebu cakueh sareng odading anu laku,” cek Yuda, 22 taun, basa ngawangkong jeung sundaonline.com di tempat nagogna, sisi Jalan Indrayasa, Istana Mekarwangi Bandung, Rebo, 12 Nopember 2014.

Yuda

Yuda geus aya kana dua taunna ngaleukeunan dagang cakueh jeung odading teh. Eta pamuda anu asalna ti Tasikmalaya teh saban poena nagog di sisi jalan dagang cakueh jeung odading ti tabuh tujuh isuk-isuk nepi ka tabuh sapuluh peuting. “Tapi upami dinten Saptu mah tabuh tujuh atanapi tabuh dalapan wengi oge tos seep. Soalna upami dinten Saptu mah rame, seueur nu jalan-jalan,” Yuda ngajentrekeun.

Pikeun nyieun sarebu cakueh jeung odading teh merelukeun 25 kilogram tarigu. Da eta we cenah, tina dua kilogram tarigu teh ngahasilkeun 80 cakue atawa odading. Yuda ngajualna cakueh jeung odading ka konsumen teh Rp 1 rebu sahijina.

Kabeneran sabot ngawangkong teh jol Abdul Gani, 22 taun, batur saprofesina Yuda. Ngan Abdul Gani mah dagangna cakueh mini. Cakueh wungkul deuih, teu jeung odading. Dagangna teu nagog di hiji tempat, tapi ngider ngadodorong roda. “Abdi mah nagog teh pami teu di dieu, nya di sakolaan,” cek eta pamuda anu asalna ti Singajaya Pakidulan Garut.

Abdul Gani.

Abdul Gani dagang cakueh mini teh ti taun 2007. Ngahaja ti lemburna ka Bandung teh rek ngadon bubuara. Nya alhamdulillah saban poe tina cakueh mini teh ngahasilkeun omset Rp 250 rebu. Tina omset sakitu teh, Abdul Gani kaagehan batina Rp 90 rebuan. “Lumayan we dibandingkeun sareng nganggur mah,” pokna bari seuri.

Omset Rp 250 rebu teh tina genep atawa tujuh kilogram tarigu. Abdul Gani ngajualna paling saeutik Rp 1 rebu  sabungkus. “Eusina, upami sarebu rupia mah ngan lima cakueh mini teh,” pokna ngajentrekeun.

Mana nu leuwih nguntungkeun, dagang cakueh mini atawa dagang cakueh gede? Mangga we etang. Ngan, cek Abdul Gani, omset Rp 250 rebu sapoe teh tina hasil dagang ti tabuh tujuh isuk-isuk nepi ka tabuh dua beurang. “Janten abdi mah henteu dur-duran kawas Yuda,” Abdul Gani seuri deui bari ngareret ka Yuda.

Sanajan pangalana geus kawilang alus, Yuda jeung Abdul Gani ngemu kahanjelu, sabab maranehna henteu bisa sakola luhur kawas batur. "Abdi mah mung tamatan SMP,” cek Yuda. “Kapungkurna abdi mah budak baong,” pokna deui.

“Sami abdi oge teu kantos sakola luhur,” Abdul Gani nempas. “Pami tamatan sakola luhur mah, panginten moal kieu nasib teh,” pokna deui.

Cek pikirna, mun tamatan sakola luhur mah bisa gawe di kantoran kawas batur. Padahal, anu di gawe di kantoran oge can karuhan alus pangalana. Pedah katingalina wungkul gaya. [] Endang GG