Gederkeun Deui Razia di Sakola!

Barudak SMP rek ka sakola make sapedah motor. | sundaonline.com

Sangkan barudak nu can sawawa jeung kolot-kolotna henteu wani ngarempak aturan berlalulintas, hadena pihak sakola kerjasama jeung kapolisian pikeun ngayakeun razia sapedah motor sacara reguler. Razia samodel kieu baris jadi pangwarah pikeun barudak katut kolot-kolotna anu ngahempekkeun—malah mupujuhkeun—anak-anakna nu can sawawa make sapedah motor.

Lamun diantepkeun, eta barudak bakal beuki maceuh, jeung bakal ngahebos barudak sejenna anu salila ieu henteu make sapedah motor jadi hayang make sapedah motor sorangan ka sakolana. Lamun diantepkeun, eta barudak bakal terus merekesel ka kolot-kolotna pikeun dipangmeulikeun atawa diidinan make sapedah motor sorangan. Lamun diantepkeun, kolot-kolot anu eleh ku anak-anakna teh bekal terus ngalobaan jumlahna. Lamun geus kitu mah, pisakumaheun gejedna rek ngawangun bangsa katut nagara teh, da ngawangun hubungan anu bener antara kolot jeung anak oge geus sakitu gejedna.

Mulang ti sakola make sapedah motor. | sundaonline.com

Utamana nu jadi kolot kudu jadi conto anu bener pikeun anak-anakna. Jadi suri tauladan cek papatah mah. Da kiwari mah aneh tingkah polah nu jadi kolot teh. Ka jalan raya make sapedah motor henteu make helm, henteu mawa SIM atawa STNK, bari di jalanna oge sok nyiap batur ti beulah kenca, atawa asup kana jalan anu saenyana mah proboden, jeung sajabana ti eta. Kituna teh bari ngabonceng anakna. Puguh we anakna teh asa dicontoan ku nu jadi kolotna. Ari digeunggeureuhkeun, sangkan make helm, mawa SIM jeung STNK, lamun tempona make sapedah motor, pokna teh enteng, “Ah, da caket ieuh, barina oge moal pulisi.”

Ku kituna, kagambar yen tingkat kasadaran masarakat urang dina palebah nyekel aturan atawa bebeneran teh masih handap. Padahal, caritana mah, kiwari teh urang geus asup kana waktuna revolusi mental. Masarakat di urang nurut kana aturan teh lamun disingsieunan. Upamana disingsieunan yen di jalan eta mah sok aya pulisi. Tapi, disingsieunan kitu lain hartina manehna jadi tumut kana aturan, tapi manehna kalah ka neangan jalan pintas, nya eta jalan anu taya pulisi. Ana kitu, hartina masih loba warga anu bedegong.

Ku lobana warga anu bedegong, nya meujeuhna revolusi mental teh digederkeun. Kumaha prak-prakanana? Taroskeun bae ka nu ngayakeunana. Ngan kawasna mah salasahiji gerakan pikeun ayana revolusi mentalteh nya eta ku ngayakeun razia kandaraan bermotor ka sakola-sakola. Lian ti razia, oge penyuluhan-penyuluhan intensif jeung reguler ngeunaan aturan berlalulintas ka masarakat, kaasup ka masarakat anu aya di sakola. [] Endang GG